Франция Исроилдан Madleen бортида ушланган французларни зудлик билан озод этишни талаб қилди

Франция ҳукумати Исроилдан инсонпарварлик ёрдами билан Ғазога йўл олган Madleen кемаси бортида қўлга олинган олти нафар Франция фуқаросини имкон қадар тезроқ қайтаришни сўради. Бу ҳақда Франция Ташқи ишлар вазирлиги ва Елисей саройи баёнотларида айтилган.

Ташқи ишлар вазирлиги баёнотида Париж Исроил ҳукумати билан «ҳар қандай ҳодисаларнинг олдини олиш учун» алоқада эканлиги таъкидланган ва ўз фуқаролари учун консуллик ҳимоясини талаб қилган.

Франция президенти Эммануэл Макрон, ўз навбатида, Елисей саройи маъмурияти орқали Исроилни Ғазо қирғоқлари яқинида яхтада бўлган французларнинг қайтишига «зудлик билан» рухсат беришга чақирди.

Шу билан бирга, расмийлар миссиядаги француз иштирокчилар Парижнинг ушбу саёҳатда иштирок этишларини қўллаб-қувватлашдан бош тортгани ҳақида олдиндан огоҳлантирилганини эслатди.

Аввалроқ Исроил ҳарбий-денгиз кучлари бортида гуманитар ёрдам ва фаоллар, жумладан, швециялик фаол Грета Тунберг билан Ғазо секторига кетаётган "Мадлин" (Madleen) кемасини қўлга олди. Ҳарбийлар кузатуви остида кема Исроил қирғоқларига йўналтирилди, унинг йўловчиларига зарар етмади.

"Мадлин" йўловчилари ўз ватанига қайтади, бортда бўлган гуманитар ёрдам эса «ҳақиқий гуманитар каналлар» орқали Ғазо секторига юборилади. Шу билан бирга, Исроил вакиллари денгиз блокадасини бузишга уринган кеманинг ўзи билан нима содир бўлишини аниқлаштирмади.