Дания ва Франция раҳбарлари Гренландия суверенитетини яна бир бор тасдиқлади

Франция президенти Эммануэл Макрон ва Дания бош вазири Метте Фредериксен 15 июн, якшанба куни Дания автоном вилоятининг пойтахти Нуук шаҳрига қўшма ташрифи чоғида Гренландия халқи билан бирдамлик ва унинг суверенитетига содиқ эканини билдирди.

«Аввало, мен Дания, Гренландия ва гренланд халқига Европа бирдамлиги ва Франциянинг қўллаб-қувватлаш хабарини етказмоқчиман», — дея Макрон сўзларини келтиради dpa. Франция раҳбари шундай давом этди: «Францияда ва Европа Иттифоқида ҳамма Гренландияни сотиб олиш ёки оддийгина тортиб олиш мумкин эмас деб ҳисоблайди».

Метте Фредериксеннинг айтишича, Макроннинг Гренландияга ташрифи Европа бирлиги ва ҳар бир давлатнинг демократия, эркинлик ва ҳудудий яхлитлиги ҳамда ўз тақдирини ўзи белгилаш ҳуқуқини ҳимоя қилишдаги қатъияти кўрсаткичидир. Унинг қўшимча қилишича, «НАТО бўйича яхши иттифоқчилар» билан биргаликда минтақада хавфсизликни таъминлаш учун катта масъулиятни ўз зиммасига олишга тайёр. Копенҳаген, унинг сўзларига кўра, Арктикада хавфсизликни таъминлаш учун Қўшма Штатлар билан ҳамкорлик қилишга тайёр, бироқ бу «ҳамкорлик, албатта, ҳурмат асосида амалга оширилиши керак».

Доналд Трамп иккинчи президентлик муддати бошида билдирган Гренландияни АҚШга қўшиб олиш истаги ҳақидаги баёнотлар фонида Макрон шу кунларда Канадада бўлиб ўтаётган «Еттилик гуруҳи» саммити чоғида Америка етакчиси билан музокаралар олиб бормоқчи эканини айтди. «Мен оптимистман, чунки провокация ва қарама-қаршиликларга эмас, балки ҳамкорликка асосланган яхшироқ келажакни қуриш йўли борлигига ишонаман», — дея хулоса қилди Франция президенти.