22 июн куни АҚШ мудофаа вазири Пит Ҳегсет ва Бирлашган Штаб бошлиқлари қўмитаси раиси генерал Ден Кейн Пентагонда АҚШнинг Эронга берган зарбалари бўйича брифинг ўтказди.
New York Times нашрининг ёзишича, Ҳегсет нутқини президент Трампни мақташ билан бошлаган ва унинг бу ҳарбий операциясини «жасоратли ва ажойиб» деб атади.
«Тунги болға» операцияси
Пит Ҳегсетнинг сўзларига кўра, АҚШнинг Эронга берган зарбалари «чалғитиш усули» (misdirection) билан амалга оширилган. Бу эҳтимол, Трамп ҳарбий аралашувга икки ҳафта ичида қарор қилиши мумкин, деган Оқ уй баёнотига ишора бўлиши мумкин.
Брифингда энг муҳим масала — Фордога қанча зарар етказилгани ва президент Трамп ишлатган «ер билан яксон қилинди» ифодасининг ҳақиқатга қанчалик яқин экани бўлди.
Генерал Кейн Эронга қарши операциянинг номи «Midnight Hammer» — «Тунги болға» бўлгани ва жуда махфий ўтказилганини айтди.
«Юқори даражадаги махфий миссия бўлиб, Вашингтонда уни фақат жуда озчилик билган», дея операцияни таърифлади генерал.
Кейннинг айтишича, B-2 бомбардимончилари АҚШ ҳудудидан ҳавога кўтарилган ва 18 соатлик парвоз давомида нишонларга етиб борган. «Midnight Hammer» операциясида жами 75 та юқори аниқликдаги қуроллар, шу жумладан, 14 та GBU-57 турдаги Massive Ordnance Penetrator бомбалари ишлатилган. Форс кўрфазидаги АҚШ Ҳарбий-денгиз флоти сувости кемаси ҳам операция доирасида 24 та Tomahawk ракетасини учирган.
