Ассалому алайкум. Бугун 6 июл, якшанба. Ўтган ҳафта давомида дунёда янги уруш бошланмади. Шунақа даврда яшаяпмизки, янги уруш бошланмаганини яхши хабар сифатида қайд этишга мажбурмиз. Ортда қолаётган ҳафтада Трампнинг Путиндан хафсаласи пир бўлди. Россия ва Озарбойжон ўртасида дипломатик низо авж олди. Москва «Толибон»ни расман тан олди. Энди Россияда қўшнимизни расман Афғонистон Ислом Амирлиги деб аташади. Қуйида бир ҳафта ичида дунёда нималар бўлганини биргаликда эслаймиз.

Хафсаласи пир Трамп

Ҳафта давомида АҚШ президенти Трамп россиялик ҳамкасби Путин билан телефонда гаплашди. Бу – икки президентнинг Трамп ҳукуматга қайтганидан кейин амалга оширган олтинчи суҳбати бўлди. Сайлов кампанияси вақтида «Урушни бир кунда тўхтатаман», деб катта кетган Трамп урушни бошлаган одам билан олти марталаб телефонда гаплашиб ҳам ҳеч нима қилолмади: уруш тўхтамади, иссиқ ўрни ва оиласини ташлаб зах окопда урушаётган украинлар, руслар ўлишда давом этмоқда. Жаноб Трамп урушни тўхтатиш унинг эмас, гўшакнинг нариги томонидаги одамнинг қўлида эканини аста-секин тушуниб етаётганга ўхшайди.

Охирги суҳбатдан кейин Трамп Путиндан хафсаласи пир бўлганини айтди. «Путин урушни тўхтатадиган одамга ўхшамайди», деди АҚШ президенти журналистлар билан суҳбатда.

Аввалроқ Америка Украинага ҳаво ҳужумидан мудофаа тизимлари учун ўқдори беришни тўхтатгани маълум бўлганди. Путин билан суҳбатдан кейин Трамп Украинага ҳаво мудофааси бўйича ёрдам беришини айтди. Яъни, Путин ва Трампнинг телефон суҳбати Украина учун фойдали бўлган кўринади.

Исроил – ҲАМАС музокараси

Эрон билан урушни тугатган Исроил яна Ғазони бомбардимон қилишга киришди. ҲАМАС аллақачон Исроилга хавф туғдирмаяпти, гуруҳ охирги марта қачон Исроилга қўлбола ракета учиргани ҳам эсдан чиқиб кетди. Лекин Исроил бутун бино қолмаган, юз минглаб одамлар харобадан харобага қочиб жон сақлаётган Ғазога ракета учиришни бас қилмаяпти. Олдинги видеоларда айтганимиздек, ҲАМАС қўлида бир уюм асирлар қолаётгани Исроил ҳукумати учун айни муддао бўлиб, Нетаняҳу ҳукумати уларни баҳона қилиб исталган вақтда уруш бошлайверади. Исроил амалдаги ҳукумати учун уруш тахтда қолиш воситасига айланиб қолганига энди кўпчилик шубҳа қилмаяпти.

Ҳафта давомида АҚШ Исроил ва ҲАМАСга 60 кунлик сулҳ таклиф қилди. Исроил уни қабул қилди, ҲАМАС эса музокарага тайёр эканини айтди. Исроилдаги ҳукумат тахтдан айрилмаслик учун Ғазони тинимсиз бомбалаётганини айтдик, лекин ҲАМАС нега асирларни қўйиб юбормаётгани тушунарсиз. Ахир бир неча ой аввал эълон қилинган сулҳ таклифларида ҳам асирлар озод қилинса, уруш тугаши айтилганди. Исроил бир нечта асирни озод қилиш учун ўн минглаб тинч аҳоли вакилларини ўлдиргани ҳам ҲАМАСни асирларни озод қилишга ундай олмаяпти...