Павел Дуров Россияда Telegram офиси очилишини рад этди

Бир йил ичида Telegram Роскомнадзорнинг хизматни Россия Федерациясига «қўндириш» бўйича учта талабидан иккитасини бажарди, деб хабар бермоқда ОАВ. Мессенжер асосчиси Павел Дуров «обрўсизлантириш» ҳақида маълум қилди.

Фото: AP

Telegram Messenger Inc. асосчиси Павел Дуров ОАВни ўз компаниясига тегишли бўлган мессенжерни «обрўсизлантириш бўйича мақсадли кампания»да айблади. Россиялик тадбиркор ОАВда 17 июл, пайшанба куни пайдо бўлган Россия Федерациясида Telegram офисини очишга тайёргарлик кўрилаётгани ҳақидаги хабарларга шундай жавоб берди.

Мессенжерга эгалик қилувчи компаниянинг ОАВ нашрлари ҳақида ҳеч қандай расмий изоҳи берилмаган, бироқ Дуров ўзининг шахсий Telegram-каналида аввалги постидан парчани такрорлаган, унда у сервисга «ОАВ босими»ни танқид қилган.

«Эҳтимол, биз журналистларнинг зарарсиз хатолари билан эмас, балки Telegramʼни обрўсизлантириш бўйича мақсадли кампания билан шуғулланаётганлар ишини кўраётгандирмиз», — дея ўз сўзларидан иқтибос келтирган тадбиркор «100 фоиз» дея матнли эслатмани қўшиб.

Hi-Tech Mail интернет-портали шу куни Telegram Messenger Inc. компанияси Россияда офис очиши мумкинлигини ёзди. Нашр эътиборни Роскомнадзор (РКН) расмий веб-сайтидаги реестрда тегишли ёзувга қаратди. Ундан келиб чиқадики, Telegramʼнинг «филиал яратиш ёки ваколатхона очиш ёки Россия юридик шахсини ташкил этиш» масаласи «тасдиқлаш босқичида».