Bloomberg: ЕИ санкциялари Ҳиндистондаги "Роснефт" заводига зарба берди

Кема эгалари ва нефт трейдерлари Ҳиндистоннинг Nayara Energy нефт компанияси билан ҳамкорлик қилишдан бош тортишни бошлади, деб ёзади 22 июл, сешанба куни Американинг Bloomberg агентлиги. Бу Европа Иттифоқи компанияга нисбатан санкциялар киритганидан кейин содир бўлди, чунки унинг 49,14 фоиз акциялари Россиянинг «Роснефт» давлат корпорациясига тегишли.

Bloomberg маълумотларига кўра, камида битта нефт танкери 20 июл куни Ҳиндистоннинг Вадинар портидаги нефтни қайта ишлаш заводидан ёнилғи олишдан бош тортган. Бу Маршалл ороллари байроғи остида сузиб юрган Talara кемаси. Буюртма 18 июлда – ЕИ санкцияларининг 18-пакети қабул қилинган куни бекор қилинди. Брокерларнинг сўзларига кўра, кема эгалари Nayara билан ишлашдан эҳтиёт бўляпти, бу ишлаб чиқарилган ёнилғини экспорт қилиши ёки нефт етказиб беришга бирдек тааллуқли.

Nayara ўз манфаатларини ҳимоя қилиш учун «ҳуқуқий ва бошқа вариантларни» ўрганаётганини айтди. Хусусан, аввалроқ маълум бўлишича, Ҳиндистон компанияси Европа Иттифоқининг қора рўйхатига тушганидан сўнг, саноатда тўлов юк жўнатилгандан кейин 15-30 кун ўтгач амалга оширилса-да, мижозлардан олдиндан тўлов ёки тижорат аккредитивини талаб қила бошлаган.

Ўз навбатида, «Роснефт» Европа Иттифоқининг санкцияларини «асоссиз ва ноқонуний» деб атаган баёнот эълон қилди, чунки компания Ҳиндистон нефтни қайта ишлаш заводининг назорат пакети эгаси эмас. Россия концернининг таъкидлашича, корхона мустақил директорлар кенгаши томонидан бошқарилади.