Ассалому алайкум, азизлар. Бугун 3 август, якшанба. Ортда қолаётган ҳафта воқеаларга бой бўлди. Путин Трампнинг ултиматумига жавоб берди, Медведев АҚШга «ядровий қиёмат-қойим» билан таҳдид қилди. Трамп бунга жавобан атом сувости кемаларини Россия яқинига юборди. Бир сўз билан айтганда, Россия ва АҚШ йўқ жойдан ядровий тўқнашув томон қадам ташлади. Қуйида ҳафтанинг баъзи муҳим воқеаларини биргаликда эслаймиз.
Путин жавоб берди
Ҳафта боши унчалик воқеаларга бой бўлмаётганди, лекин ҳафта якунида Путин, Медведев, Лукашенко ва Трамп каби сиёсатчилар интригани ошириб беришди. Масалан, жума куни Владимир Путин Карелия оролидаги черковга дўсти Александр Лукашенкони чақириб, у ердаги поплар иштирокида диний амалларни бажарди. Путин ё Лукашенко ёки поплар бир кадрда кўриндими, билаверинг – Россия президенти қандайдир жиддий гап айтмоқчи. Одатда шунақа бўлган. Бу гал у ҳам Лукашенко билан учрашди, ҳам черковда шам ушлаган кўйи кўриниш берди.
Диний амаллар тугагач, Лукашенко ва Путин черков ҳовлисида сайр қилиб, ўриндиқ ҳолига келтирилган кундага ўтириб дам олишди. Ва шу пайт қўлига микрофон кўтарган журналистлар гуруҳи пайдо бўлди. Улар Путиндан «Товариш главнокомандуюший, Америка деган давлат президенти Трамп сизга муддат беришга жазм қилди, унга қандай жавоб берасиз?» дейишди.
Путин хотиржамлигини табассум билан кўрсатишга уриниб, «бу борада айтажак биринчи гапим шуки, биз «Орешник» ракетасини серияли ишлаб чиқаришни бошладик», деди. Бу гапнинг таржимаси шундай бўлади: «Трампми, ундан каттасими, ким бўлса ҳам менга шарт қўёлмайди, улар муддат белгиласа, мен ракета чиқараман, ҳеч кимга қараб иш қилмайман».
Лукашенко Путиннинг гапларини қувватлаб, Украинани «югуриб келиб Путин билан келишишга» чақирди. «Акс ҳолда бир, бир ярим ойда руслар ҳаммасини эгаллаб олади», деб қўшимча қилди бир вақтлар Ўзбекистонга ақл ўргатишга уринган Лукашенко. Лекин Батка шу ерда цензурага учради. Путинга унинг «руслар эгаллаб олади» деган гапи ёқмади-да, «қайтиб олишади денг, бу ерлар бизники», деди. Яъни ўз вақтида Украина ҳудудий яхлитлигини расман тан олган Путинга кўра Украина ерлари Россияга тегишли экан. Қайси ҳужжатга кўра? Жаноб Путин бунисини айтмади.
Трамп ва Медведев баҳси
Бу ҳафта «Ростелеком» раиси, дарвоқе, 4 йил Россияда президент ҳам бўлиб ишлаган Дмитрий Медведев АҚШ президенти Трамп билан тортишиб қолди. Тўғрироғи, Трамп Россия собиқ президенти билан тортишди. АҚШ президенти россиялик ҳамкасби Путинга Киев билан сулҳ имзолаш учун ўн кун муддат берганди. Медведев бунга жавобан Трампнинг гаплари сабаб Россия ва АҚШ урушиб кетиши мумкинлигини айтди.
