Ҳафта давомида АҚШда қурол тақчиллиги юзага келгани маълум бўлди, Украина ва Россияда тинч аҳоли уруш қурбонига айланишда давом этди, Жанубий Кореяда мисли кўрилмаган можаро авж олди. Корейслар ЖЧ саралашида ишлаган хорижлик ҳакамлар учун массаж хизматлари ташкил қилиб бергани аниқланди. Қуйида ҳафтанинг шу ва бошқа муҳим воқеаларини биргаликда ёдга оламиз.
Америкада қурол тугаяпти
Дунёдаги ҳарбий қудрати энг кучли бўлган Америкада қурол-яроқ захираси жиддий камайган ва ҳатто ракета тақчиллиги юзага келган. Бу ҳақда Америка нашрлар ҳарбий мулозимларга таяниб хабар берди. Журналистларнинг аниқлашича, Америка ҳарбийлари асосий ҳаво ҳужумидан мудофаа тизимлари учун захирадаги 80 фоиз ракеталарни ишлатиб бўлган. Омборларда хавфли даражада кам ракета қолган. Трамп Кэмп-Дэвиддаги вазирлар маҳкамаси йиғилишида ўқдори тақчиллиги бўйича Пентагон раҳбари Пит Ҳегсетдан ҳисобот сўраган.
Эсингизда бўлса, Трамп Эронга «иккинчи жаҳон уруши давридан буён энг йирик зарбалар» ваъда қилган, кейинроқ гўёки «дипломатияга имкон бериш учун» буйруқни бекор қилганди. Аслида гап дипломатияда эмас, Америка армиясида ракета тақчиллиги юзага келганида экан. Масалан, ҳозир америкаликларда Patriot ҳаво ҳужумидан мудофаа тизимлари учун ракета тақчиллиги юзага келган. Бу 155 ммли снаряд эмаски бир пасда ишлаб чиқариб, омборни тўлдириб қўйишса. Бу дефицитни бартараф этиш йиллаб вақт талаб қилади.
Трамп ўқдори етишмовчилигининг бош айбдори сифатида табиийки Жо Байденни кўрсатди. Кэмп-Дэвиддаги йиғилишда эса президент Пентагон раҳбари Ҳегсетни, уруш вазири ўз навбатида ўз ёрдамчисини айблаган. Қолганини тасаввур қилиш қийин эмас, ўринбосар ўз ўринбосарини, у ҳам ўз ёрдамчисини айблаган, охир-оқибат айбдор ракета омборининг қоровули бўлиб чиқса ҳам, ажаб эмас.
Лекин қурол омборлари нега бўшаб қолгани тушунарли. Трамп Исроил манфаати учун Эронга қарши уруш очди, мамлакат амалда ярим йилдан бери уруш ҳолатида. Эронга кам ракета отилди дейсизми, бунга жавобан форслар ҳам Америка базаларини нишонга олди, бу ракеталарни қайтариш учун мудофаа ракеталари керак.
Уруш ана шунақа нарса, Америкадек давлатларнинг омборларини бўшатиб қўяди. Ва энг қизиғи, Америка Исроил деган иттифоқчиси учун уруш бошлаб ҳеч қандай фойда кўрмади, зарар кетидан зарар. Қайтанга «шунча катта Америка бир бурда Исроил йўриғига юраркан» деган гап орттириб олди. Урушда Америка омборлари бўшаб қолгани Эронга қанақа обрў олиб беришини тасаввур қилаверинг.
