Ҳафта давомида Эрон Америка президенти Трампни ўлдиришга урингани маълум бўлди. АҚШ махфий хизмати Трампни озиқ-овқат фургонига яшириб, ҳарбий самолётга олиб ўтгани бутун дунёда муҳокама қилинди. Шунингдек, Путин илк марта японлар ўзиники деб ҳисоблайдиган Курил оролларига борди. Марказий Осиёда 2022 йилдаги каби бўлмаса ҳам, жиддий блэкаут кузатилди. Қирғизистон президенти Жапаров Хитой – Қирғизистон – Ўзбекистон темирйўл қурилиши учун Путиндан рухсат олиб келганини айтиб берди. Қуйида ҳафтанинг шу ва бошқа муҳим воқеаларини ёдга оламиз.
Трампни фургонга яширишди
Ҳафтанинг энг муҳим воқеаси – Доналд Трампга навбатдаги марта суиқасд қилишга уринишгани бўлди. Оқ уй раҳбари Анқарадаги НАТО саммитидан ҳарбий самолётда қайтгани, президент самолётидан фургонда бошқа учоққа ўтказилгани ҳазил билан гапирилмоқда, лекин ишонинг, бу жиддий воқеа бўлди. Америка нашрлари янгидан-янги тафсилотлар эълон қиляпти. Уларда ёзилишича, Трампга суиқасд ҳақида катта эҳтимол Исроил ташқи разведка ташкилоти Моссад ахборот олган.
Хабарларга кўра, Эрон таъсиридаги шиа гуруҳлардан бири Анқарадаги аэропорт яқинига кўчма ракета комплекси олиб борган экан. Яъни Трампнинг самолётига ҳужум Эрондан туриб эмас, Туркиянинг ўзидан амалга оширилиши мумкин бўлган. Исроилликлар бу ҳақда МРБни хабардор қилгач, америкаликлар бунга жиддий қарамаган, лекин кейинроқ махфий хизмат Трампни қутқариш бўйича бутун дунё хабар топган операцияни амалга оширган.
Бу операциядан кейин ҳаммани бир савол ўйлантирмоқда: агар чиндан Эрон Трампнинг самолётини уришни мақсад қилган бўлса, нега президент яширинча тарзда ҳарбий самолётга ўтказилди-ю, биринчи бортда қолган журналистлар, делегация аъзолари Британиягача гўёки Эрон нишонидаги самолётда учиб кетди? Америка президентининг ҳаётини қутқариш операцияси махфий қолиши учун ўнлаб одамлар ҳаёти хавф остига қўйилдими?
Эрон ҳали Трампнинг самолётига ҳеч қандай ракета отмай дунёда шунча ваҳима кўтарилди. Бу эса Америка Эронда уруш бошлаб ҳеч нимага эришмагани, фақат муаммо орттираётганини билдиради. Агар Трампни НАТО давлатида ўлдириши мумкинлигига бутун бошли Америка ва Исроил разведкасини ишонтира олган бўлса, демак Эронда ҳали ҳам куч бор экан.
Путин Курилга борди
Ҳафта давомида Россия президенти Путин илк марта Курил оролларига борди. Бу Кремл раҳбарининг ҳудудларга одатий ташрифларидан бири эмасди. Чунки Япония Курил ороллари ўзига тегишли эканини даъво қилади. Путин шунча вақтдан буён президент бўлса ҳам, у ерга бирор марта бормаганди. Охирги марта оролга Медведев президент сифатида борган.
