АҚШ президенти Доналд Трамп Россия президенти Владимир Путин ва Украина президенти Володимир Зеленский билан учрашуви имкониятларини «яхши» деб баҳолади. 6 август, чоршанба куни Оқ уйда бўлиб ўтган матбуот анжуманида Трамп журналистнинг «Путин ва Зеленский учрашувга рози бўлганми?» деган саволига: «Ушбу учрашув тез орада бўлиб ўтиши учун яхши имконият бор», деб жавоб берди.
Трампнинг тушунтиришига кўра, ҳозирча бундай учрашув ўтказиладиган жой бўйича қарор қабул қилинмаган. Шу билан бирга, Америка раҳбари Москванинг савдо ҳамкорларига қарши иккиламчи санкциялар жорий этилишини истисно этмади. Бироқ, у тегишли қарорни «кейинроқ» қабул қилишини айтди.
6 август куни Россия президенти Владимир Путин ва АҚШ президентининг махсус вакили Стив Уиткофф ўртасида Кремлда уч соат давом этган учрашувдан сўнг, AP агентлиги Оқ уйнинг исми ошкор этилмаган вакилига таяниб, Трамп Путин билан 11 августдан бошланадиган ҳафтадаёқ учрашиши мумкинлигини хабар қилди.
Худди шундай маълумот шу куни кечқурун Германиянинг dpa агентлиги томонидан тарқатилди. Германия ҳукумати доираларидаги манбаларга кўра, Трамп яқин орада Путин билан учрашиб, Украинадаги урушни тугатиш бўйича музокаралар ўтказмоқчи.
