Тошкентда ноқонуний бошланган қурилиш тупроқ ўпирилишига олиб келди

Тошкентда ноқонуний бошланган кўп қаватли уй қурилиши сабаб аҳоли уйларидан бир неча метр масофада тупроқ ўпирилиши рўй берди.

Воқеа Яккасарой тумани Салар кўчасида, Дилбулоқ маҳалласидаги кўп қаватли уйлар ҳудудида содир бўлган.

Қурилиш инспекциясининг маълум қилишича, бу ердаги қурилиш ишлари “Lyuks Loyiha” МЧЖ томонидан ишлаб чиқилган лойиҳа ҳужжатлари асосида амалга оширилмоқда. Лойиҳа учун “Архитектура ва шаҳарсозлик кенгаши” ишчи органи ҳамда “Шаҳарсозлик ҳужжатлари экспертизаси” ДУКнинг ижобий хулосалари олинган.

Қурилиш объектининг А блоки Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекциясидан белгиланган тартибда рўйхатдан ўтган. Шу кунга қадар инспекция томонидан объектда 10 марта мониторинг ўтказилиб, 11 та ёзма кўрсатма берилган. Шунингдек, қурилиш меъёр ва қоидаларига риоя қилинмагани сабабли буюртмачи икки маротаба маъмурий жавобгарликка тортилган.

Бироқ, лойиҳанинг G4 блоки бўйича вазият бошқача. Бу блок “Архитектура ва шаҳарсозлик кенгаши”дан ижобий хулоса олган бўлса-да, “Шаҳарсозлик ҳужжатлари экспертизаси” ДУКдан хулоса олинмаган. Шу боис мазкур блок инспекцияда рўйхатдан ўтмаган ва қурилиш ишлари ноқонуний бошлангани аниқланди. Ҳолат юзасидан инспекция томонидан тегишли тартибда ҳуқуқни муҳофаза қилувчи органларга маълумот берилган.

Шунингдек, ўрганиш жараёнида буюртмачи “O‘zkommaishiysavdo” МЧЖ томонидан G4 блок учун котлован қазиш ишлари олиб борилаётганда ҳудуддаги электр трансформаторида носозлик юзага келгани аниқланган. Шу сабабли котловандаги сизот сувларини чиқариш имкони бўлмаган, натижада сув даражаси кўтарилиб кетган. Бунинг оқибатида қўшни “Grand Capital” МЧЖ томонидан илгари қурилган ерости автомашина турар жойининг қайта кўмилган жойларида тупроқ силжиши юз бериб, сирпанишга сабаб бўлган.