Фарғонада коррупцияга қарши курашишга масъул мансабдор қамалди

У ходимдан камчиликларни раҳбарга айтмаслик эвазига 1500 АҚШ доллари талаб қилган.

Фото: Видеодан кадр / MY5

Фарғона вилоятида коррупцияга қарши курашишга масъул шахслар пора билан қўлга тушди. Бу ҳақда «Ҳудуд» дастурида хабар берилди.

Маълум бўлишича, Фарғона ҳудудий электр тармоқлари акциядорлик жамиятининг коррупцияга қарши курашиш ва комплаенс назорат бўлим бошлиғи вилоятдаги туманлардан бирининг электр тармоқлари корхонаси бош муҳандиси 2024 йилдаги 9 ойлик фаолияти давомида йўл қўйган камчиликларни раҳбарга айтмаслик эвазига 1500 АҚШ доллари талаб қилган.

Мансабдор шахс пуллардан 1000 долларини олган вақтида ашёвий далиллар билан ушланган. Кейинчалик бу жиноятга жамиятнинг ходимлар билан ишлаш бўлими бошлиғи ҳам алоқадорлиги аниқланган.

Қайд қилинишича, суд ҳукми билан бу шахсларга мансабдорлик ва моддий жавобгарлик лавозимларида ишлаш ҳуқуқи 2 йил муддатга чекланиб, 2 йил-у 1 ойга озодликдан маҳрум этиш жазоси тайинланган.