Қумқўрғонда фаррошликка ишга қабул қилиш учун пора олган мактаб директори жиноий жазога тортилди. Kun.uz суд ҳужжати билан танишди.
Суд ҳукмида келтирилишича, 40 ёшли С.К. (аёл) Қумқўрғон туманидаги 83-сонли мактаб директори лавозимида ишлаб келган. У иш сўраб келган Л.Т.дан мактабга 0,5 штат бирлигида фаррош сифатида ишга қабул қилиш эвазига 1 500 доллар талаб қилган.
Шунингдек, Қумқўрғон тумани мактабгача ва мактаб таълими бўлими мансабдор шахслар орқали яна 0,25 штат бирлиги очиб, қўшиб бериши мумкинлигини, бунинг учун бўлим мансабдор шахсларига 400-500 доллар пора бериши лозимлигини айтган.
Шу тариқа, директор Л.Т.дан 0.75 штат бирлигида фаррошликка ишга қабул қилиш учун 2 минг доллар сўраган. Келишилган пулни 1 900 доллар ва 1,2 млн сўм кўринишида олган вақтида тезкор тадбирда ушланган.
С.К. судда айбига иқрор бўлган ҳамда қилмишига пушаймонлик билдириб, суддан енгиллик сўраган.
Судда жабрланувчи Л.Т.нинг ҳам кўрсатмаси тингланган.
“Директорга ишга киришим кераклигини, лекин дипломим йўқлигини билдирдим. С.К. ишга олишини, лекин ишга олиш ўзидан ўзи бўлмаслигини, жекпоти борлигини айтди. Фаррош сифатида ишга олиш учун 2 000 доллар атрофида пул кетишини маълум қилди”, деган Л.Т. ўз кўрсатмасида.
Мактаб директорининг айби гувоҳлар кўрсатмаси ҳамда бошқа далиллар билан ўз тасдиғини топган.
ЖИБ Қумқўрғон туман судининг 2026 йил 11 сентябрдаги ҳукми билан С.К. Жиноят кодексининг 210-моддаси (пора олиш) 1-қисми ҳамда 28,211-моддаси (пора бериш) 1-қисмида назарда тутилган жиноятни содир қилишда айбли деб топилган. Унга 1,5 йил муддатга давлат иштирокидаги ташкилотларда мансабдорлик ва моддий жавобгарлик юклатилган вазифаларда ишлаш ҳуқуқидан маҳрум қилган ҳолда 3 йил озодликни чеклаш жазоси тайинланган.
С.К.га кафе, бар, ресторанларга бормаслик ҳамда бошқа оммавий тадбирларда иштирок этмаслик, рухсатсиз Сурхондарё вилояти ҳудудидан чиқмаслик мажбуриятлари юклатилган.
Аввалроқ пора сифатида моноблок олган Жомбой туман экология бўлими бошлиғи 5 йилга озодликдан маҳрум қилинганди.
