Туркия транспорт вазири тезликни меъёрдан оширгани учун жарима тўлади

Вазир 140 км/соатгача рухсат берилган жойда автомобил тезлигини 225 км/соатгача олиб чиққан ва бунинг видеосини ижтимоий тармоққа жойлаган. Танқидлардан кейин, у ўз ихтиёри билан жарима тўлаганини маълум қилди.

Фото: Ege Politik

Туркия транспорт вазири Абдулқодир Ўролўғли транспорт воситасини бошқараётганида тезликни меъёрдан оширди. Ҳолат ижтимоий тармоқларда муҳокамаларга сабаб бўлгач, ўз ихтиёри билан полицияга мурожаат қилиб, жарима тўлаганини айтди.

Дастлаб Ўролўғли Х ижтимоий тармоғида Анқара-Ниғде трассаси бўйлаб сафарининг видеосини эълон қилди, унда автомобил тезлиги 225 км/соатга етгани кўринади. Қонун бўйича трассада белгиланган тезлик чеклови 140 км/соатни ташкил қилади.

Видеолавҳа ОАВ ва ижтимоий тармоқларда тезда тарқалиб, йўл ҳаракати хавфсизлиги учун масъул бўлган амалдорнинг бундай хатти-ҳаракати кўплаб танқидларга сабаб бўлди.

Эртаси куни вазир жарима тўлагани ҳақидаги баённома суратини улашди.

Ўролўғли сўзларига кўра, у шахсан полицияга мурожаат қилиб, қоидабузарликни тан олган. Охир-оқибат 9267 лира (230 доллар) миқдорида жаримага тортилган.

Ўролўғли қонун барча учун, жумладан, вазирлар учун ҳам бир хил эканини таъкидлади.

Тайёрлаган: Сардор Юсупов

#Туркия #қоидабузарлик #Абдулқодир Ўролўғли