Беларусни тарк этишдан бош тортган Статкевич колонияга қайтарилди

Тасдиқланмаган маълумотларга кўра, 11 сентябр куни бошқа сиёсий маҳбуслар билан бирга озодликка чиққан ва Литвага кетишдан бош тортган Беларус президентлигига собиқ номзод 69 ёшли Николай Статкевич колонияга қайтарилган. Унинг қаердалиги бир неча кун мавҳум бўлганидан сўнг, у Глубокое шаҳридаги колониялардан бирида топилди, деб хабар берди «Наша Нiва» нашри «ишончли манба»га таяниб.

Статкевич ҳақида бошқа ҳеч қандай маълумот берилмаган, бошқа оммавий ахборот воситалари ҳам Беларус раҳбари Александр Лукашенконинг рақиби тақдири ҳақида ҳеч нарса хабар қилмаган. «Зеркало» ва «Наша Нiва» нашрларининг таъкидлашича, Статкевич озод этилишидан олдин Витебск вилоятининг Глубокое шаҳридаги колонияда инкоммуникадо режимида сақланган.

Айни пайтда сиёсатчининг рафиқаси Марина Адамовичнинг айтишича, Глубокоедаги 13-сонли ахлоқ тузатиш колонияси мухолифат етакчисининг қаерда эканлиги ҳақида қандайдир маълумот беришдан бош тортмоқда.