АҚШ чет эллик малакали ишчилар визаси учун 100 минг доллар тўлов жорий этди

19 сентябр куни АҚШ президенти Доналд Трамп федерал ҳукумат малакали чет эллик ишчиларга бериладиган визалар учун йилига 100 минг долларлик тўлов жорий этишини айтди. Бу АҚШнинг H-1B деб аталувчи визаларни тақсимлаш тартибидаги сезиларли ўзгариш ҳисобланади.

New York Timesʼнинг ёзишича, ушбу қадамлар Трамп маъмуриятининг иммиграциянинг барча шаклларига қарши кенг қамровли курашининг навбатдаги ҳаракатлари сифатида кўрилди. H-1B учун янги тўлов ҳуқуқий эътирозларга дуч келиши мумкин. Лекин агар кучга кирса, халқаро малакали ходимларни ёллайдиган компаниялар ушбу визада ишлаётган ҳар бир ходим учун олти йилгача йилига 100 минг доллар тўлаши керак бўлади. Бу тўлов фақат янги мурожаатчиларга татбиқ этилади, деди Оқ уй расмийси.

«Ёки бу шахс компания ва Америка учун жуда қимматли бўлади, ёки у кетади ва компания америкаликни ёллайди», деди савдо вазири Ховард Лутник жума куни Оқ уй Овал офисида имзолаш маросимида. «Иммиграциянинг мақсади — америкаликларни ишга олиш ва келаётган одамлар энг энг юқори даражадаги бўлишини таъминлашдир».

.@POTUS signs a Proclamation to restrict the entry of certain H-1B aliens into the U.S. as nonimmigrant workers, requiring a $100,000 payment to accompany or supplement H-1B petitions for new applications.

AMERICA FIRST! pic.twitter.com/AzAUJzXawV

— Rapid Response 47 (@RapidResponse47) September 19, 2025

У, шунингдек, «бу визаларни бепул бериб, одамларнинг АҚШга шунчаки кириб келишига чек қўйинг», деди.

Нашрнинг ёзишича, технология, молия, шифохоналар ва университетлар кўплаб ишчи ўринларини тўлдиришда H-1B визаларига таянади. Янги тўлов уларнинг ишчи ўринларини тўлдириш имкониятига сезиларли таъсир кўрсатиши мумкин, бу эса мамлакат ишчи кучининг табиатини ўзгартиради.

Ҳукумат маълумотларига кўра, июн охирида Amazon H-1B визаси асосида ишлаётган 10 мингдан ортиқ ходимга эга эди — бу бошқа исталган компаниядан анча кўп. Бошқа йирик фойда кўрган компаниялар орасида Microsoft, Meta, Apple, Google, JPMorgan Chase, Walmart ва Deloitte ҳам бор.

Трамп шу куни нархи 1 миллион доллар бўлган «олтин картаси»ни ҳам тақдим қилди. Бу карта орқали жисмоний шахслар ва корпорациялар АҚШда тезлаштирилган резидентлик ҳуқуқини олишлари мумкин бўлади.