АҚШ-Эрон уруши
Душанбага келиб АҚШ кучлари кетма-кет тўққизинчи кун Эронга зарбалар берди. Шу билан бирга, қайта бошланган тўқнашувларда ҳалок бўлган америкалик ҳарбийларнинг тасдиқланган сони уч нафарга етди.
«Биз бугун тунда уларга яна жуда қаттиқ зарба бердик ва буни жума кунидан бери ҳалок бўлган АҚШ ҳарбий хизматчилари хотираси учун қилдик», деди Трамп журналистларга.
АҚШ Марказий қўмондонлиги ўз баёнотида Эроннинг кемаларга ҳужум қилиш қобилиятини «заифлаштириш»га қаратилган «янги зарбалар тўлқини»ни бошлаганини маълум қилди, бироқ бошқа тафсилотлар келтирилмади.
Эрон ОАВларига кўра Табриз, Чобаҳор, Конарак ва Бандар-Маҳшаҳр каби шаҳарларида портлаш овозлари эшитилган.
Маълум қилинишича, шанба куни Ироқ шимолидаги АҚШ ҳарбий базалари жойлашган ҳудудда америкалик бир аскар ҳалок бўлган. Иорданияда ҳам АҚШнинг икки нафар ҳарбий хизматчиси ҳалок бўлган ва учинчиси бедарак йўқолган.
Шу билан Эронга қарши уруш бошланганидан бери ҳалок бўлган АҚШ ҳарбийлари жами сони 17 нафарга етди. Яна 420 нафар америкалик аскар ярадор бўлган. 28 февралда уруш бошлаган АҚШ ва Исроилнинг ўзи эса Эрон ва Ливанда минглаб одамлар ўлимига сабаб бўлди.
Ўз навбатида, Эрон Ислом инқилоби муҳофизлари корпуси Сурия ҳудудидаги «душман махсус операциялар штаб-квартираси»га кутилмаган зарба берилганини эълон қилди. Шунингдек, Кувайтдаги авиабазаларда жойлашган АҚШ ҳарбий объектлари ҳамда техникаларига дронлар орқали ҳужум уюштирилди.
Бир ой олдин имзоланган вақтинчалик сулҳнинг барбод бўлиши ва Ҳўрмузни назорат қилиш учун кураш ортидан АҚШ ва Эрон ҳужумларни жадаллаштирди. Бу эса кенг кўламли урушга қайтиш хавфини оширмоқда.
Жаҳон чемпионати якунланди
Якшанба куни бутун дунёда миллионлаб инсонлар кузатган футбол байрамида Испания миллий жамоаси амалдаги чемпион Аргентинани 1:0 ҳисобида мағлуб этиб, Жаҳон кубогини улардан тортиб олди. Бу ғалаба Испанияни яна жаҳон футболининг чўққисига олиб чиқди ва янги даврни бошлаб берди.
Прессинг устаси бўлган Испания асосан тўпга эгалик қилган бўлса-да, унинг ҳужумларини якунлайдиган одам топилмади. Захирадан майдонга тушган Торрес қўшимча таймларда — 106-дақиқада тарихий гол муаллифи бўлди.
Аргентиналиклар эса Жаҳон чемпионати финаллари тарихида бутун 90 дақиқада рақиб дарвозасига бирор марта ҳам зарба бера олмаган биринчи жамоага айланди. Месси бошчилигидаги Аргентина ҳужум қилишдан кўра кўпроқ майда қоидабузарликлар қилиш, футболкалардан тортиш, туртиш ва ўйин маромини бузиш билан банд бўлди.
Қайсидир маънода уларнинг ўйинни фақат битта қизил карточка билан якунлагани ҳам ҳайратланарли бўлди дейиш мумкин. Якуний ҳуштак чалинганидан кейин аргентиналик футболчиларнинг асаби дош беролмай, жанжал чиқарди.
ФИФА раҳбари Жанни Инфантино билан бирга ўйинни кузатган АҚШ президенти Доналд Трамп якунда Жаҳон кубогини испанларга топширди.
Россия-Украина уруши
Россия тунда Украина пойтахтига уруш бошланганидан бери энг йирик баллистик ракета зарбаларидан бирини берди. Оқибатда камида бир киши ҳалок бўлди ва яна 16 киши яраланди.
Украина Ҳарбий-ҳаво кучларининг хабар беришича, Киевга турли турдаги — 41 та ракета учиб келган.
Киев мэри Виталий Кличко сўзларига кўра, зарар кўрган иншоотлар орасида турар жой бинолари, омборхоналар, супермаркет ва ётоқхона бор. У яна уч кишининг аҳволи оғирлигини қўшимча қилди.
Якшанба кунги алоҳида ҳужумда Харков шаҳри чеккасидаги почта депосига берилган зарба оқибатида тўрт киши ҳалок бўлган ва 19 киши яраланган.
Расмийларнинг хабар беришича, Запорижжя шаҳрида ҳам Россия бомбалари оқибатида камида икки киши ҳалок бўлган ва 14 киши яраланган.
Россия ҳужумларидан бир кун олдин — 18 июлга ўтар кечаси Украина дронлари «Wildberries» компаниясининг Подмоскове ва Тамбов вилоятидаги иккита омборига ҳужум қилганди. Оқибатда камида саккиз киши ҳалок бўлди, 80 дан ортиқ киши жароҳатланди.
Зарбалардан бири компаниянинг Электросталдаги йирик логистика марказига тўғри келди: ёнғин оқибатида кўтарилган тутун 200 километрдан ортиқ масофага чўзилди. Ёнғинни ҳатто бир сутка ўтгач ҳам тўлиқ ўчиришнинг имкони бўлмади.
Зеленский «Wildberries» омборига қилинган ҳужумга изоҳ бериб, у ерда Россия армияси учун дронларнинг айрим қисмлари сақланганини даъво қилди. Шунингдек, Зеленский бу ҳужумлар Украинадаги фуқаролик инфратузилмасига берилган зарбаларга жавоб эканини айтди. Украина Россиянинг бошқа регионларига ҳам дронлар билан ҳужум қилди.
Британияда янги бош вазир
«Шимол қироли» номи билан танилган Энди Борнҳам душанба куни Буюк Британиянинг сўнгги ўн йилликдаги еттинчи бош вазирига айланади. У мамлакатни аҳоли учун ҳақиқатда муҳим масалаларга — яшаш қиймати инқирози ва сифатсиз ишлаётган давлат хизматларига кўпроқ эътибор қаратиши учун тизимни «қайта қуриш»га ваъда бермоқда.
Бугун Кир Стармер ўзининг хайрлашув нутқини сўзлаб, Қирол Чарлзга расман истеъфога чиқиш аризасини топширади. Шундан кейин Катта Манчестернинг собиқ мэри Борнҳам ҳам монарх билан учрашиб, бош вазирлик лавозимини қабул қилиб олади.
Ҳақиқий оғир иш ва масъулият шундан кейин бошланади.
Reutersʼнинг ёзишича, 56 ёшли Борнҳам Буюк Британиянинг самарасиз ишлаётган коммунал хизматларидан тортиб, суст иқтисодий ўсишигача бўлган узоқ муаммолар рўйхатига дуч келмоқда. У биринчи навбатда ўзининг етакчи вазирлар жамоасини эълон қилиши керак — бу масала ҳозирнинг ўзидаёқ Лейбористлар партиясида баҳсларга сабаб бўлмоқда.
Унинг дастлабки сиёсий қарорлари ҳам диққат марказида бўлади, чунки унинг жамоаси ўз режаларини тезда амалга оширишга интилмоқда.
Перуда зилзила
Якшанба куни Перунинг тоғли ҳудудида юз берган иккита кучли ер силкиниши оқибатида камида олти киши ҳалок бўлди ва 21 киши жароҳатланди.
Перу Миллий сейсмология марказига кўра, магнитудаси 5.1 ва 3.7 бўлган ушбу зилзилалар пойтахтдан 300 км шарқда жойлашган Чупака провинциясида содир бўлган.
Марказнинг билдиришича, биринчи зилзила 24 км, иккинчиси эса 18 км чуқурликда қайд этилган.
Дастлабки ҳисоботларга кўра, 48 га яқин уй бутунлай вайрон бўлган, яна 18 таси қисман зарар кўрган. Табиий офат қарийб 300 кишига таъсир кўрсатди ва ҳозирда уларга вақтинчалик чодирлар етказилмоқда.
Ушбу провинциянинг талафот кўрган қишлоқларидаги уйлар, одатда, хом ғиштдан тикланган оддий ва мўрт иншоотлардир. Расмийларга кўра, фавқулодда вазиятлар гуруҳлари вайроналар остида бошқа қурбонлар ҳам бўлиши ҳақидаги хавотирлар сабабли қидирув ва тозалаш ишларини бошлаган.
Бир ой олдин Перу яқинида — Венесуэлада ҳам 7 балли иккита йирик зилзила содир бўлганди. Ушбу табиий офат қурбонлари сони эса 5200 кишидан ошган.
