Хитой компанияси «Пунгон-Наманган» йўлини реконструкция қилади

Хитойнинг CITIC Construction компанияси 246 млн доллар эвазига «Пунгон-Наманган» автомобил йўлининг 75 км қисмини реконструкция қилади. Бу ҳақда транспорт вазири Илҳом Маҳкамов Ўзбекистон 24 телеканалига берган интервюсида маълум қилди.

Вазирнинг таъкидлашича, амалдаги йўл икки тасмали бўлиб, Фарғона водийсидаги энг тирбанд йўллардан бири ҳисобланади. Бу ерда кўп ҳолларда йирик йўл-транспорт ҳодисалари содир бўлади.

«Биз аллақачон Хитойнинг йирик CITIC компанияси билан биргаликда йўлни реконструкция қилиш ишларини бошладик. Президентимиз қурилиш ишларини сифатли бажариш ва лойиҳани ўз вақтида якунлаш бўйича алоҳида топшириқ берди», деди Маҳкамов.

Аввалроқ Наманган вилоятини ижтимоий-иқтисодий ривожлантириш юзасидан ўтказилган йиғилишда кунига 15 минг транспорт ҳаракатланадиган «Пунгон-Наманган» йўлининг 75 километри реконструкция қилиниши маълум қилинганди. Бу йўл 246 миллион доллар ҳисобига 4 тасмали, бетон қопламали қилиб қурилиши, 34 та кўприк, 22 та пиёдалар ўтиш жойлари барпо этилиши кўзда тутилган.