АҚШ Иммиграция хизмати офиси ўққа тутилди, қурбонлар бор

Номаълум қуролли шахс Далласдаги АҚШ Иммиграция ва божхона назорати (ICE) идорасига милтиқдан ўт очди. Икки муҳожир ҳалок бўлди, яна бири оғир аҳволда касалхонага ётқизилган. Қуролланган шахс ўз жонига қасд қилди.

Фото: Jeffrey McWhorter/REUTERS

24 сентябр, чоршанба куни номаълум қуролли шахс АҚШ Иммиграция ва божхона назорати (ICE)нинг Далласдаги идорасига милтиқдан ўт очди, икки муҳожир ҳалок бўлди, яна бири оғир аҳволда касалхонага ётқизилган. Қуролланган шахс ўз жонига қасд қилди. ICE ходимларидан ҳеч ким жабрланмади, деб хабар бермоқда Reuters.

Ҳужум яқинда АҚШ иммиграция қонунчилигини бузганликда гумон қилиниб қўлга олинган шахсларни олдиндан рўйхатдан ўтказиш ва бошқа маъмурий тартиб-қоидалар билан шуғулланувчи идорага амалга оширилган. Хабарларга кўра, қўшни бинонинг томидан ўқ узилган. Ўқларнинг бир қисми кейинчалик ўлдирилган ва яраланган муҳожирлар бўлган бино ёнида турган фургонга қарата отилган.

ФТБ директори Кэш Пател ижтимоий тармоққа ҳужумчи томонидан фойдаланилмаган гилзалар кўрсатилган суратни жойлаштирди. Улардан бирида ANTI-ICE деб ёзилган. «Тергов давом этаётган бир пайтда, далилларнинг дастлабки таҳлили ушбу ҳужумнинг мафкуравий сабабини кўрсатади», деди Пател.