«Атиги 7 дақиқада ва безбетларча» – Лувр музейидан «бебаҳо» заргарлик буюмлари ўғирлаб кетилди

Ўғрилар нималарни олиб кетди?

Расмийларнинг сўзларига кўра, якшанба куни содир бўлган ўғрилик чоғида Лувр музейидан «ҳисоблаб бўлмас» қийматга эга саккизта заргарлик буюми ўғирлаб кетилган.

Жиноятчилар Луврнинг Аполлон галереясини нишонга олишган — бу ерда Франциянинг тарихий тож жавоҳирлари коллекцияси сақланади.

Ўғирланган буюмлар қаторида императрица Евгениянинг диадемаси бор. Бу диадема 212 дона марварид, 1 998 дона бриллиант ва 992 дона «гулбарг» услубида кесилган бриллиант билан безатилган.

Императрица Евгениянинг безакли камари эса – ялтираб турган, заргарлик тошлари билан безатилган буюм императрицанинг энг машҳур аксессуарларидан бири бўлган. У 2 438 дона бриллиант ва 196 дона «гулбарг» кесимли бриллиант билан безатилган.

Ўғирланган буюмлар орасида малика Мари-Амелия ва малика Ортансга тегишли сапфир тўпламидан диадема, сирғалар ва маржон, шунингдек, Наполеоннинг иккинчи рафиқаси – Мария Луиза учун тайёрланган зумрад тўй совғаси тўпламининг айрим қисмлари мавжуд.

Ўғрилар шошилинч қочиш чоғида императрица Евгения учун 1855 йилда яратилган тожни тушириб юборган. У саккизта олтин бургут, 1 354 дона бриллиант, 1 136 дона «гулбарг» услубида кесилган бриллиант ва 56 дона зумраддан иборат. Париж прокуратураси яна бир заргарлик буюми ҳам «жиноятчилар қочиши чоғида йўқотилган ёки ташлаб кетилгани»ни билдирди, аммо у қайси буюм эканини очиқламади.

Шунингдек, улар Sotheby’s томонидан 60 миллион доллардан ортиқ баҳоланган машҳур «Регент» олмосига ҳам тегмаган.

Расмийлар нима дейди?

Франция президенти Эммануэл Макрон ижтимоий тармоқларда бу ўғирликни «биз ардоқлайдиган мерос — тарихимизга қилинган ҳужум» деб атади. «Биз асарларни қайтарамиз ва жиноятчилар жавобгарликка тортилади. Бунга эришиш учун ҳамма жойда, ҳамма нарса қилинмоқда».

«Бу филм ёки сериалдан олинган сценарийга ўхшайди», деди Лувр жойлашган Париж маркази мэри Ариел Вейл. «Улар энг қимматбаҳо нарса — нафақат моддий нуқтаи назардан, балки рамзий жиҳатдан ҳам», деди у интервюсида.

Ҳокимият вакилларининг айтишича, терговчилар ўғрилар ташлаб кетган буюмлар ва кузатув камераларидаги тасвирларни ўрганмоқда. «Бу катта кўламли ўғирлик», деди ички ишлар вазири Лоран Нюнез.

Нюнезнинг айтишича, ўғирлик аниқ режалаштирилгани ва тезлиги билан тажрибали жиноятчилар гуруҳига хос «қўл ёзуви»ни кўрсатади. Бузиб кирилган пайтда музей аллақачон ташрифчиларга тўла эди. Олтин безакли Аполлон галереясида ёки унинг яқинида беш нафар музей ходими бўлган.

Франция маданият вазирлиги баёнотига кўра, улар Луврнинг хавфсизлик протоколига мувофиқ «одамлар хавфсизлигини устувор қилган ҳолда» полицияга мурожаат қилишган. Ҳеч ким жароҳат олмади, деди вазирлик, бироқ Париж прокуратураси ходимларга ўғрилар томонидан пўписа қилинганини билдирди.

Париж прокурори Лор Бекконинг айтишича, жиноятчилар залдаги энг қиммат — 60 миллион долларлик олмосларга тегмаган.

«Нега уни олмай кетишганини тушунтира олмайман. Улар қўлга олингач, кимнинг буюртмаси билан ҳаракат қилганини биламиз», — деди Бекко.

Reuters’нинг ёзишича, жиноятчилардан бири сариқ хавфсизлик жилети кийган бўлган — у терговчилар томонидан топилган. Шунингдек, улар қочиш чоғида кранни ёқиб юборишга уринган, бироқ муваффақиятсиз бўлган.

«Ҳозирча барча эҳтимоллар ўрганилмоқда. Жиноят эҳтимол буюртма асосида — хусусий коллекционер учун амалга оширилган бўлиши мумкин. Агар шундай бўлса, ўғирланган асарлар яхлит ҳолда қайтарилиши эҳтимоли бор», — деди прокурор. Агар ўғрилар фақат қимматбаҳо тош ва металлга қизиққан бўлса, буюмлар эритиб ёки қора бозорда сотилиши мумкин.

Ички ишлар вазири Лоран Нюнез воқеани тергов қилиш иши йирик ўғирликлар билан шуғулланувчи махсус полиция бўлимига топширилганини айтди.

Маданият вазири Рашида Датининг айтишича, сўнгги 40 йил ичида йирик музейларни ҳимоя қилиш масаласига эътибор жуда кам бўлган. «Лувр раҳбари икки йил аввал полициядан хавфсизлик аудити ўтказишни сўраган эди. Чунки музейлар жиноятчиликнинг янги шаклларига мослашиши керак. Бугунги кунда бу — ташкилотли, профессионаллар томонидан амалга ошириладиган жиноятлар», деди у.

Лувр ва музейлардаги ўғриликлар

Собиқ қироллик саройи бўлган бино Француз инқилобидан кейин музейга айлантирилган. Унда 33 мингдан ортиқ асар сақланади: Қадимги Юнонистон, Миср ва Месопотамия ҳайкаллари, Европа ва Осиёнинг йирик санъат асарлари ҳам шу ерда жойлашган.

Ҳар куни музейга 30 минггача инсон музейга ташриф буюради, бу уни дунёдаги энг кўп ташриф буюриладиган музейга айлантиради. Энг машҳур асар — Леонардо да-Винчининг «Мона Лиза» асари атрофида шу қадар катта гавжумлик бўлиши сабабли, шу йил бошида унга алоҳида бино қурилиши айтилганди.

NYT'нинг ёзишича, Лувр — сўнгги пайтларда ўғирликлардан зарар кўрган Франция музейларининг навбатдагиси.

Ўтган ҳафта Коррезе шаҳрида собиқ президент Жак Ширак номидаги музей қуролланган ва ниқобланган шахслар томонидан таланди, орадан бир неча соат ўтиб, тўрт киши ҳибсга олинди.

Сентябр ойида ўғрилар Луврдан бир неча метро бекати наридаги «Табиий тарих» миллий музейидан тахминан 700 минг долларга тенг хом олтин қуймаларини ўғирлаб кетишди. Ўша ойда «Адриэн Дубоучé» музейидан 9,5 миллион еврога баҳоланган икки ликопча ва бир вазона ўғирлашди.

Якшанба кунги ўғирлик Лувр тарихидаги энг машҳурларидан бирига айланиши мумкин, бироқ у биринчиси эмас. Музей илгари ҳам бир неча бор йирик ўғирликлар нишони бўлган.

Хусусан, Луврдаги энг машҳур ўғирлик 1911 йил ёзида содир бўлган. Ўшанда «Мона Лиза» портрети музей ходими Винченсо Перужжа томонидан ўғирланган. Икки йиллик шов-шувли ёритувлардан сўнг, Перужжа Италияда расмни сотмоқчи бўлганида қўлга олинган ва асар қайтарилган.