Конгрессменлар Трампни Марказий Осиё давлатлари иштирокида саммит ўтказишга чақирди

АҚШ Конгресси аъзолари Сидни Камлагер-Дав ва Билл Ҳюизенга президент Доналд Трампга дипломатик форум ташкил этилганининг 10 йиллиги муносабати билан Вашингтонда C5+1 етакчилари саммитини ўтказишга чақирувчи мактуб йўллади. Бу ҳақда конгрессвумен Камлагер-Дав расмий сайти хабар берди.

2015 йилда ташкил этилган C5+1 форуми Қўшма Штатларнинг Марказий Осиё бешта давлати - Қозоғистон, Қирғизистон, Тожикистон, Туркманистон ва Ўзбекистон билан ҳамкорлик қилиш учун кўп томонлама платформадир.

Мактубда конгрессменлар форум юбилейи Марказий Осиё билан ҳамкорликни мустаҳкамлаш ва минтақадаги АҚШ стратегик манфаатларини - хавфсизлик, иқтисодиёт, «юмшоқ куч» ва бошқарув соҳаларида илгари суриш учун ноёб имконият эканини таъкидлаган.

«Президентнинг C5+1 саммитидаги шахсий иштироки форумнинг 10 йиллигини муҳим дипломатик лаҳзага айлантириши ва АҚШ-Марказий Осиё муносабатларининг кейинги ўн йилликдаги йўналишини белгилаб бериши мумкин», дейилади конгрессменлар мактубида.

Шунингдек, қонун чиқарувчилар маъмуриятни саммитнинг аниқ натижалари ва Марказий Осиё билан узоқ йиллик ҳамкорлик йўналишларини мустаҳкамлайдиган келишувларни тайёрлашга чақирди.

«Марказий Осиё - АҚШ» (C5+1) формати АҚШ ва Марказий Осиёнинг бешта давлати ўртасидаги мулоқот ва биргаликдаги саъй-ҳаракатлар учун платформадир. У 2015 йил ноябрь ойида Самарқандда бўлиб ўтган ташқи ишлар вазирларининг биринчи учрашувидан сўнг ташкил этилган ва 2023 йил сентябрь ойида бўлиб ўтган президентлар учрашувига қадар ташқи ишлар вазирлари даражасида ўтказилган.

Ушбу ташаббус доирасидаги муҳокамаларнинг асосий йўналишлари хавфсизлик, иқтисодиёт ва экология ҳисобланади.

Марказий Осиё мамлакатлари ва АҚШ ТИВ раҳбарларининг 5+1 шаклидаги сўнгги учрашуви 28 февраль куни Остонада бўлиб ўтган эди. Шунда томонлар минтақа мамлакатлари ўртасида ҳам, АҚШ билан ҳам савдо-иқтисодий алоқаларни кенгайтириш масалаларини муҳокама қилди.