АҚШ Сенати қўмитаси РФни терроризм ҳомийси сифатида белгилашни маъқуллади

АҚШ сенатори Линдси Грэм Сенатнинг Ташқи алоқалар қўмитаси Россияни терроризмнинг ҳомийси сифатида белгилаш тўғрисидаги қонун лойиҳасини қўллаб-қувватлаганини эълон қилди. Бу Грэмнинг ушбу мақсадга эришиш учун учинчи уриниши.

Фото: picture alliance/Middle East Images

АҚШ Сенатининг Ташқи алоқалар қўмитаси республикачи сенатор Линдси Грэмнинг Россияни терроризм ҳомийси сифатида белгилаш тўғрисидаги қонун лойиҳасини бир овоздан қўллаб-қувватлади. Бу ҳақда Грэмнинг веб-сайтида чоршанба, 22 сентябр куни хабар берилди.

Қонун лойиҳасида Россия ўғирланган украиналик болаларни қайтармаса, терроризм ҳомийси сифатида белгиланиши айтилган. Қонун лойиҳаси ҳали Вакиллар палатаси ва Сенатнинг тўлиқ таркиби томонидан кўриб чиқилиши ва кейин АҚШ президенти томонидан тасдиқланиши керак.

Грэм Россияни терроризмнинг ҳомийси деб эълон қилиш «Россия иқтисодиёти учун ҳалокатли оқибатларга олиб келишини» таъкидлади. Ҳозирда бу номга тўртта давлат эгалик қилади: Куба, Эрон, Сурия ва Шимолий Корея.

Бу Грэм бошчилигидаги АҚШ сенаторларининг Россияни терроризм ҳомийси деб эълон қилиш бўйича биринчи уриниши эмас. Улар шунга ўхшаш қонун лойиҳаларини 2022 йил сентябр ва 2024 йил июн ойларида тақдим этган.

2025 йил март ойида Грэм Россияга «санкциялар дўзахи» ваъда қилди ва музлатилган 300 миллиард доллардан ортиқ Россия активларини мусодара қилишга чақирди. Бу ташаббусларнинг барчаси амалга оширилмади.