Рус тили имтиҳонидан ўтолмаган мигрантлар сони маълум қилинди

Мигрантларнинг учдан бир қисмидан кўпроғи биринчи уринишда рус тили имтиҳонидан ўтолмади. Бу ҳақда Россия Таълим ва фан вазирлигига таяниб РИА Новости хабар берди.

Маълум қилинишича, 2025 йилнинг июль ойидан сентябрь ойигача рус тили бўйича имтиҳонни биринчи уринишда чет элликларнинг 35 фоиздан ортиғи топшира олмаган. Умуман олганда, бу даврда Россияда ишлаш рухсатномаси ёки патент олиш учун зарур бўлган тест синовларида 275,6 минг киши иштирок этди. Уларнинг деярли 87 фоизи рус тилидан имтиҳонни муваффақиятли топширди.

Биринчи даражадаги аттестация Россияда ишлаш рухсатномасини олиш учун талаб қилинади ва фақат тил билиш имтиҳонини ўз ичига олади. Иккинчи блок вақтинча яшаш учун рухсатнома (РВП), учинчи блок эса яшаш учун рухсатнома (ВНЖ) бериш учун зарур. Улар Россия қонунчилиги тарихи ва асослари бўйича тестларни ўз ичига олади. Вазирликнинг аниқлик киритишича, имтиҳонни мамлакат ҳудудидаги 203 та пунктда топшириш мумкин. Улар Россиянинг барча субъектларида, шунингдек, унинг ташқарисида, хусусан, Тожикистон ва Ўзбекистонда ҳам ташкил этилган.