Тегишли қарор лойиҳаси 24 июл, жума куни Черногория ҳукумати сайтида эълон қилинган.
Ҳужжатга кўра, Черногорияга визасиз кириш ва мамлакат ҳудудида бўлиш тартибини белгилайдиган қоидаларга ўзгартиш киритиш режалаштирилган. Россия ва Беларус фуқаролари 30 кунгача визасиз бўлиши мумкин бўлган давлатлар рўйхатидан чиқарилади.
Шу билан бирга, ҳужжатда ўтиш даврига оид алоҳида қоида белгиланмоқда. Унга кўра, Россия ва Беларус фуқаролари икки томонлама сафарлар тўғрисидаги халқаро келишувлар асосида 2026 йил 31 октябрга қадар Черногорияга визасиз кириши, мамлакат ҳудудидан транзит ўтиши ва 30 кунгача бўлиши мумкин.
Бунинг учун улар ўз мамлакатларининг ваколатли органлари томонидан берилган амалдаги сафар ҳужжатларига эга бўлиши лозим.
1 ноябрдан қандай тартиб амал қилиши ҳозирча номаълум
Россия ва Беларус фуқаролари 2026 йил 1 ноябрдан бошлаб Черногорияга айнан қандай тартибда кириши ҳозирча маълум қилинмаган.
Бундан ташқари, ҳужжатдаги ўзгартишлар ҳали якуний эмас. Қарор лойиҳаси Черногория ҳукумати томонидан тасдиқланиши лозим.
Аввалроқ Черногория ОАВ Россия фуқаролари учун виза тартиби 2026 йил сентябр охирида жорий қилиниши мумкинлиги ҳақида хабар берган эди. Янги лойиҳа эса амалдаги визасиз тартиб 31 октябрга қадар сақланиб қолишини назарда тутмоқда.
Ўзгаришлар Черногориянинг ЕИга қўшилиши билан боғлиқ
Черногориянинг виза сиёсатидаги ўзгаришлар мамлакатнинг Европа Иттифоқига аъзо бўлиш йўлидаги қадамларидан бири ҳисобланади.
ЕИ виза сиёсати талабларига мувофиқ, Черногория ўз визавий тартибини иттифоқ қоидаларига мослаштириши керак. Хусусан, Европа Иттифоқи виза талаб қиладиган давлатлар билан мавжуд визасиз режим бўйича келишувларни қайта кўриб чиқиш талаб этилади.
Шу сабабли Подгорица Россия ва Беларус билан бир қаторда Туркия, Хитой, Бирлашган Араб Амирликлари, Қатар, Баҳрайн ва бошқа айрим давлатлар фуқаролари учун ҳам визасиз режимни босқичма-босқич бекор қилишни режалаштирмоқда.
Черногория элчихонаси Россия фуқароларини виза режими жорий этилиши ҳақида ҳали 2025 йилда огоҳлантирган эди.
2026 йил июл ойи бошидан Россиянинг бир қатор шаҳарларида Черногория виза марказлари иш бошлаган. Бироқ янги тартиб расман тасдиқлангунига қадар ушбу марказларда асосан учинчи давлатлар фуқароларига хизмат кўрсатилмоқда.
Черногорияга 2022 йилда 100 мингдан ортиқ россиялик борган
Россиянинг Украинага кенг кўламли ҳужуми бошланган 2022 йил 24 февралдан 10 октябрга қадар 112 мингдан ортиқ Россия фуқароси Черногорияда 90 кунгача бўлиш учун ариза берган. Бу ҳақда ўша вақтда Черногория Ички ишлар вазирлиги маълум қилган.
Худди шу давр мобайнида 50 мингдан сал кўпроқ Украина фуқароси ҳам шундай ариза топширган.
Кейинчалик маҳаллий ОАВ Россия фуқароларининг бир қисми яшаш учун рухсатнома олиш ва тадбиркорлик фаолиятига оид маҳаллий қонунчиликдаги шартлар сабаб Черногорияни тарк эта бошлаганини ёзган. Уларнинг кўпчилиги қўшни Сербияга кўчиб ўтган.
2026 йил ҳолатига Черногорияда доимий ёки узоқ муддат яшаётган Россия фуқароларининг аниқ сони бўйича расмий маълумотлар келтирилмаган. ОАВ баҳоларига кўра, мамлакатда 21 мингдан 26 минг нафаргача россиялик истиқомат қилади. Бу Черногория аҳолисининг тахминан 3 фоизини ташкил этади.
