AFP агентлиги хабар қилишича, Deliver нефт танкери суд эгаси томонидан белгиланган жарима тўланганидан кейин Марсел яқинидаги Фос-сюр-Мер портини тарк этиб, Франциянинг ҳудудий сувларидан чиқиб кетган.
Бундан бир кун аввал Марсел округ суди танкер эгаси бўлган компанияни давлат байроғидан фойдаланиш қоидаларини бузганликда айбдор деб топиб, жарима жазосини тайинлаган.
Маълум қилинишича, танкер Камерун байроғи остида ҳаракатланган. У Россиянинг Приморск нефт портидан Сингапурга йўл олган вақтда, июн ойи охирида Франция ҳарбий-денгиз кучлари томонидан Сицилия соҳиллари яқинида байроқ ҳужжатларини текшириш мақсадида тўхтатилган ва Фос-сюр-Мер портига кузатиб борилган.
AFP эслатишича, Камерун ҳукумати 2025 йил май ойи охирида ушбу танкер энди мамлакат байроғи остида қатновни давом эттира олмаслиги ҳақида расмий ҳужжат эълон қилган.
Европа Иттифоқи эса 2025 йил феврал ойида Deliver танкерини Россиянинг нефт савдосига нисбатан жорий этилган чекловларни четлаб ўтишда иштирок этган деган гумон билан санкциялар рўйхатига киритган.
Франция ҳозирга қадар Европа Иттифоқининг санкциялар рўйхатига киритилган жами бешта кемани ушлаб қолган. Улардан иккитасига нисбатан суд жарима жазосини тайинлаган.
Ғарб мамлакатлари «соя флот» деб Россиянинг нефт экспортига қаратилган санкцияларни четлаб ўтиш учун учинчи давлатлар байроғи остида қатнайдиган, асосан эски нефт танкерлари тармоғини атайди. Франция расмийлари баҳосича, Россиянинг бундай «соя флоти» таркибига 800 дан 1000 тагача кема киради.
