Чехияда ўнг популистлар коалиция тузилганини эълон қилди

Чехияда учта ўнг популистик партия раҳбарлари 3 ноябр куни ҳукмрон коалиция тузилганини эълон қилди. Ҳамкорлар унинг мақсади “бошқача Европа” — “суверен миллий давлатлардан иборат ишончли иттифоқ” эканини таъкидлади, деб хабар беради AFP агентлиги.

Сўнгги парламент сайловларида ғалаба қозонган “Норози фуқаролар акцияси” (ANO) партияси раҳбари, миллиардер Андрей Бабиш Чехиянинг бош вазири бўлиши кутилмоқда. У ҳукуматни декабр ўрталаригача шакллантириш ниятида эканини, шунда 2026 йил бюджети тасдиқланишига улгуришини маълум қилди.

Koалицияга ANO билан бирга кичик шерик сифатида антимигрант руҳдаги “Эркинлик ва тўғридан тўғри демократия” (SPD) ҳамда “Автомобилистлар ўзлари учун” партиялари кирмоқда. Сайлов натижаларига кўра, ушбу уч партия парламентнинг қуйи палатасидаги 200 ўриндан жами 108 тасини қўлга киритган.

SPD Чехиянинг ЕИдан чиқиши бўйича референдум ўтказишни қўллаб-қувватлайди. Партиянинг сайловолди кампанияси ҳам миграцияни кескин танқид қилишга қаратилган эди. “Автомобилистлар” эса ЕИнинг ички ёнув двигателларидан босқичма-босқич воз кечиш режаларига қарши чиқади.

Уч партия баёнотида ЕИ “аъзо давлатларга уларнинг ички суверенитетини заифлаштирадиган қарорларни мажбурий тарзда юклашига ҳақли эмас”, дейилади.

Умуммиллий даражада машҳур бўлган ўнг популистик ANO раҳбари Бабиш Киевга ўқ-дорилар етказиб бериш дастурини — Прага томонидан мувофиқлаштирилаётган лойиҳани — тўхтатиш нияти борлигини олдинроқ билдирган. Шунингдек, у Украинага Чехия давлат бюджети ҳисобидан ҳар қандай ёрдамни бутунлай чиқариб ташлашни режалаштираётганини айтди. “Бу маблағлар ўз фуқароларимизга сарфланиши керак”, — деди 71 ёшли сиёсатчи.

ЕИ сиёсати борасида ҳам Бабиш қарама-қарши курсни кўзлаётгани айтилмоқда. Бироқ AFP қайд этишича, у SPD'нинг Чехиянинг ЕИдан чиқиш бўйича референдум ўтказиш зарурлиги ҳақидаги позициясига қўшилмайди.