Ўзбекистоннинг Чехиядаги элчихонасида ушбу мамлакатнинг ZYLORA компанияси вакиллари билан учрашув бўлиб ўтди. Унда Ўзбекистон Миграция агентлиги ва Чехия Соғлиқни сақлаш вазирлиги ўртасида тиббиёт ходимлари ва ҳамшираларни тартибга солинган меҳнат миграцияси асосида ишга жалб этиш масалалари муҳокама қилинди.
Томонлар ушбу йўналишдаги ҳамкорликни янада ривожлантириш, малакали мутахассисларнинг Чехияга қонуний ва тартибли ишга жойлашишини таъминлаш бўйича фикр алмашди. Шунингдек, меҳнат миграцияси соҳасида икки давлат ўртасидаги ҳамкорликни кенгайтириш истиқболлари ҳам кўриб чиқилди.
Учрашувда ZYLORA компанияси вакиллари келгусида Чехияда ишга жойлаштириш учун Ўзбекистонда ҳамшираларни тайёрлайдиган ихтисослаштирилган ўқув курсларини ташкил этиш имкониятини ўрганаётганини маълум қилди.
Бундан ташқари, компания Чехияга тиббиёт ходимларини юбориш билан боғлиқ амалдаги қонунчилик, меъёрий-ҳуқуқий база ва тартиб-таомилларни батафсил ўрганиш ниятида эканини билдирди.
Маълум қилинишича, Чехияда рўйхатдан ўтган ZYLORA компанияси халқаро бизнесни ривожлантириш, компанияларни рўйхатдан ўтказиш, молиявий ва солиқ масалалари бўйича консалтинг ҳамда халқаро банк хизматларини кўрсатиш билан шуғулланади. Кейинги йилларда компания Марказий Осиё мамлакатлари, хусусан, Ўзбекистон билан иқтисодий ҳамкорликни ривожлантиришга алоҳида эътибор қаратмоқда.
