ФВВ иситиш мавсуми учун хавфсизлик эслатмаларини эълон қилди

Об-ҳаво совиши муносабати билан Фавқулодда вазиятлар вазирлиги (ФВВ) аҳолини ис газидан заҳарланиш, газ-ҳаво аралашмасининг чақнаши ва ёнғинларнинг олдини олишга қаратилган қоидаларга қатъий риоя қилишга чақирди.

Фото: Kun.uz

Бунда, иситиш печи ва дудбуронлар соз бўлиши, беркитилмаслиги, ёриқ-сизиб чиқишларсиз ҳолатда текширилиши керак.

Газ ускуналарини улаш фақат меъёрга мувофиқ амалга оширилади, резина шланглар орқали улаш тақиқланади.

Қўлбола/носоз электр ва газ иситиш жиҳозларидан фойдаланманг — ҳаёт учун хавфли.

Дудбурон ва ҳаво чиқариш каналларини махсус ташкилотларга ўз вақтида тозалаттиринг.

Уйда вентиляцияни таъминланг, иситиш ускуналари ишлаганда эшик-тешиклар мутлақ ёпиб қўйилмасин.

Газ ёки тутун ҳиди келса, ёндириш қурилмалари ва чўғланувчи асбобларни ишлатманг, хонадан чиқиб, тегишли хизматларга хабар беринг.

Болалар ва кексалар назоратига эътиборни кучайтиринг, уйда СО (ис гази) детектори ўрнатиш тавсия этилади.

Вазирлик иситиш мавсумини беталафот ўтказиш учун ҳар бир хонадонда хавфсизликни биринчи ўринга қўйиш, носозлик аниқланса, зудлик билан мутасадди хизматларга мурожаат қилишни сўради.

Тайёрлаган: Отабек Матназаров

#ФВВ #ис гази #газ