Тўртинчи уриниш. Ўсмирлар жамоаси ЖЧдаги иштирокини бошламоқда

Бугун, 5 ноябр куни Ўзбекистон U-17 жамоаси жаҳон чемпионатидаги иштирокини бошлайди. Исломбек Исмоилов бошчилигидаги ўсмирлар жамоаси дастлабки ўйинда Парагвайдан келган тенгқурларига қарши баҳс олиб боради.

Учрашув старти Тошкент вақти билан соат 18:00 га белгиланган. Ўйин Спорт ТВ жонли эфирида трансляция қилинади.

Гуруҳдаги кейинги ўйинлар Ирландия (8 ноябр) ва Панама (11 ноябр) жамоаларига қарши бўлиб ўтади.

Саудиядаги қаҳрамонлик

Исломбек Исмоилов бошчилигидаги жамоа апрел ойида Саудия Арабистонида ўтказилган Осиё чемпионатида жаҳон чемпионати йўлланмасини қўлга киритганди.

Ўшанда жамоа аввалбошдан турнир чемпионлиги учун асосий фаворитлардан бири эканини намойиш этганди. Гуруҳ босқичида дастлаб Таиланд 4:1 ҳисобида мағлуб этилган, иккинчи турда Хитой устидан 2:1 ҳисобида иродали ғалабага эришилган бу орқали гуруҳ босқичи ва жаҳон чемпионати йўлланмасини ҳал қилинганди. Учинчи турда мезбон Саудия Арабистонига қарши расмиятчиликка айланган ўйинда йирик 3:0 ҳисобида якунланганди.

Плей-оффда эса аввалига БАА 3:1 ҳисобида таслим этилди, яримфиналда эса КХДР дарвозасига жавобсиз 3 та тўп киритилди, ҳолбуки шимолий кореяликлар чоракфиналда Индонезияни 6:0 ҳисобида мағлубиятга учратганди.

Финал эса чинакамига драматик тус олди. Ўзбекистон вакилларига биринчи бўлимнинг ўзида икки бор қизил карточка кўрсатилди: аввалига 39-дақиқада Нурбек Сарсенбаевга қўполлик учун тўғридан тўғри қизил карточка кўрсатилди ва футболчи майдонни кўзда ёш билан тарк этди. Биринчи бўлимга қўшиб берилган дақиқаларда эса Миразиз Абдукаримов «сўнгги умид фоли» учун майдондан четлатилди.

Лекин бу зарбалар жамоага акс таъсир кўрсатди ва футболчилардаги иштиёқ ҳаддан ортиқ даражада ортиб кетди. Иккинчи бўлим бошида мезбонлар футболчиси жарима майдони ичида тўпни қўли билан ўйнади, Муҳаммад Ҳакимов эса белгиланган пеналтини аниқ ижро этиб, ҳисобни очди.

70-дақиқада эса Садриддин Ҳасанов тезкор қарши ҳужумда рақиб посбони билан яккама-якка вазиятга чиқиб борди ҳамда тўпни унинг оёқлари орасидан ўтказиб, иккинчи голни урди.

Ўйиннинг қолган қисмида ҳисоб ўзгармади ва Ўзбекистон вакиллари 9 киши ҳолатида ғалабани сақлаб қолиб, Осиё чемпионига айланди.

Бу жамоа турнир давомидаги олти ўйинда рақиблар дарвозасига жами 17 та гол уриб, атиги 3 та гол ўтказиб юборганди.

Олдинги мундиаллар

Ўзбекистон ўсмирлар жамоаси бунга қадар уч марта жаҳон чемпионатларида иштирок этган ва икки бор чоракфиналгача етиб борган.

Ўзбекистон ўз тарихидаги илк бундай турнирга йўлланмани 2010 йил кузида Тошкентда ўтказилган Осиё чемпионатида қўлга киритганди. Ўшанда Алексей Евстафеев бошчилигидаги жамоа финалгача етиб борган, аммо КХДРга қарши финалда жамоа етакчилари Сардор Раҳмонов ва Аббосбек Махсталиев майдондан четлатилиши ўйин тақдирини ҳал қилганди.

Ушбу жамоа кейинги йил ёзида Мексика майдонларида ўтказилган мундиалда ҳам катта шов-шув кўтаради. Ўзбекистон илк ўйинда Янги Зеландия вакилларига ютқазиб қўйган (1:4), аммо АҚШ (2:1) ва Чехияга (2:1) қарши ўйинларда муҳим очколарни қўлга киритиб, гуруҳда биринчи ўринни эгаллаганди. Плей-оффдаги илк ўйинда Австралияга ҳеч қандай имконият қолдирилмайди, аммо чоракфиналда Уругвай Ўзбекистоннинг юришини тўхтатади. Уругвай эса яримфиналда Бразилия тўсиғидан ҳам ўтади, финалда мезбон Мексикага ютқазиб, кумуш медалларга сазовор бўлади.

Ўша таркибда Тимур Ҳакимов, Аббос Махсталиев, Бобур Давлатов, Сардор Раҳмонов, Сардор Собирхўжаев, Забиҳулло Ўринбоев, Жавлон Мирабдуллаев, Азизбек Муротов ва Давлатбек Ёрбеков каби ёш юлдузлар порлаганди.

Ўзбекистон ўсмирларининг кейинги авлоди ҳам жаҳон чемпионатига чиққан. Дилшод Нуралиев бошчилигидаги жамоа 2012 йилда Эрондаги Осиё чемпионати финалида Японияни пеналтилар сериясида мағлуб этиб, чемпион бўлади ва 2013 йил БААда ўтказилган турнирга йўлланма олади.

Ўзбекистон Марокаш, Хорватия ва Панама каби жамоалар билан бир гуруҳдан ўрин олиб, иккинчи ўрин билан плей-оффга чиқади. Гуруҳда дастлаб Панама 2:0 ҳисобида мағлуб этилган, Марокашга қарши ўйинда ҳисоб очилмай қолган (0:0), Хорватияга қарши ҳал қилувчи баҳс эса 2:1 ҳисобидаги ғалаба билан якунланган, ўзбекистонликлар фақат тўплар нисбатига кўра Марокашдан ортда қолиб, иккинчи ўрин билан гуруҳдан чиқишганди.

Аммо плей-оффнинг илк босқичида Ҳондурасга қарши ўйиннинг биринчи бўлимида Акромжон Камилов қизил карточка олади, иккинчи бўлим ўрталарида КОНКАКАФ вакиллари ғалаба голини уришади ва Ўзбекистон ўз иштирокини якунлайди.

Ўсмирлар жамоасининг бу таркиби Рустам Ашурматов, Отабек Шукуров, Жамшид Болтабоев, Одил Ҳамробеков, Акобир Тўраев, Жавоҳир Сиддиқов, Акром Комилов ва Шоҳжаҳон Аббосов каби номлар билан ёдда қолган.

2023 йил ёзида Олим Шокиров бошчилигидаги Ўзбекистон ўсмирлари Таиландда бўлиб ўтган Осиё Кубогида чоракфиналда Саудия Арабистонини мағлуб этиб, ЖЧ йўлланмасини қўлга киритади.

Ўша йил кузида Индонезияда бўлиб ўтган турнирда эса жамоа чоракфиналгача бориб, Мексикадаги натижани такрорлайди.

Жамоа Испания, Канада ва Мали каби кучли жамоалардан иборат гуруҳдан ўрин олганди. Дастлабки ўйин Малига йирик ҳисобда бой берилади (0:3), иккинчи турда Канада худди шу ҳисобда мағлуб этилади, ҳал қилувчи ўйинда эса Испания билан қайд этилган дуранг (2:2) гуруҳлардаги энг яхши учинчи ўрин эгалари сафида плей-оффга чиқиш имконини беради.

Нимчоракфиналда жамоа сенсация кўтариб, Англияни мағлуб этади (2:1). Аммо чоракфиналда Франция ўсмирларининг қўли устун келади (1:0).

Ўша таркибда Амирбек Саидов, Лазизбек Мирзаев, Беҳруз Шукуруллаев каби ўсмирлар ёрқин ўйин кўрсатганди.

Бу сафарги турнирда Ўзбекистон нисбатан осон гуруҳдан ўрин олганидан келиб чиқиб, плей-офф йўлланмаси минимум вазифа бўлиб турибди. Жамоа бу турнирда ҳам камида чоракфиналга чиқиш натижасини такрорлаши кутилмоқда.