Uzbekistan Airways ва CALC (China Aircraft Leasing Group Holdings Limited) лизинг компанияси икки класс (икки хизмат кўрсатиш синфи)ли салон конфигурациясига эга тўртта янги Airbus A321neo самолётини лизинг асосида етказиб бериш бўйича дастлабки келишувни (letter of intent, LOI) имзолади. Ҳаво кемаларини етказиб бериш 2027–2028 йилларда амалга оширилиши режалаштирилган.
Янги самолётлар Airbus компаниясининг замонавий Airspace Premium салонлари, бортда замонавий кўнгилочар тизим ва симсиз юқори тезликдаги интернет билан жиҳозланади. Бу ечимлар йўловчиларга парвоз вақтида рақамли хизматлардан фойдаланиш имконини беради ҳамда бортидаги қулайлик даражасини янада оширади.
Имзоланган келишувлар Uzbekistan Airways ва CALC ўртасидаги муваффақиятли ҳамкорликнинг мантиқий давоми бўлиб, авиакомпания ҳамда дунёдаги етакчи лизинг берувчилардан бири ўртасидаги муносабатлар барқарор ривожланаётганини кўрсатади.
2026–2028 йилларга мўлжалланган авиапаркни янгилаш ва кенгайтириш бўйича узоқ муддатли дастурга мувофиқ, Uzbekistan Airways 2028 йил охирига қадар CALC компаниясидан жами олтита Airbus A321neo самолётини қабул қилиб олишни режалаштирган. Бу эса авиакомпанияга A321neo лайнерлари сонини 15 тага етказиш ва Марказий Осиёнинг етакчи авиаташувчиси сифатидаги мавқеини янада мустаҳкамлаш имконини беради.
Uzbekistan Airways бошқаруви раиси Шуҳрат Худойқулов таъкидлаганидек, CALC билан ҳамкорлик авиакомпанияни модернизация қилиш йўлидаги муҳим босқич ҳисобланади. Унинг сўзларига кўра, флотни тизимли равишда янгилаш, замонавий технологияларни жорий этиш ва йўловчилар қулайлигини ошириш авиакомпаниянинг барқарор ривожланиш ва халқаро бозорда рақобатбардошликни кучайтириш стратегиясига тўлиқ мос келади.
CALC президенти ва тижорат директори Винни Лю эса тўртта A321neo самолётини етказиб бериш бўйича янги келишув орқали Uzbekistan Airways билан ҳамкорлик янада мустаҳкамланаётганини қайд этди. Унга кўра, ушбу сўнгги авлод самолётлари CALC’нинг авиакомпанияларни флотни янгилаш учун барқарор ва мослашувчан ечимлар билан қўллаб-қувватлашга интилишини акс эттиради, бу эса эксплуатация самарадорлиги ва йўловчилар қулайлигини оширади.
Янги Airbus A321neo самолётларининг келтирилиши Uzbekistan Airways’нинг транспорт самарадорлигини ошириш, йўналишлар тармоғини кенгайтириш ва углерод изини қисқартиришга қаратилган флотни модернизация қилиш ҳамда хизмат кўрсатишни рақамлаштириш бўйича кенг кўламли дастурининг бир қисми ҳисобланади.
