Абхазияда уч ўзбекистонлик ЙТҲ оқибатида ҳалок бўлди

«Крайслер» автомобили ҳайдовчиси бошқарувни йўқотди ва дарахт билан тўқнашди.

Фото: Telegram / apsnypress

Абхазиянинг Қиндиғ қишлоғидаги йўл-транспорт ҳодисаси оқибатида уч нафар ўзбекистонлик ҳалок бўлди, бир киши тиббиёт муассасасига етказилди.

«Қиндиғ қишлоғига етмасдан йўлнинг текис қисмида «Крайслер» автомобили ҳайдовчиси бошқарувни йўқотиб қўйди. Оқибатда дарахт билан тўқнашув содир бўлди», деб хабар берди ЙҲХБ бошлиғи ўринбосари Аслан Базба.

«Уч киши ҳалок бўлди, бир киши оғир аҳволда шифохонага етказилди. Улар булоқдан Сухум томон йўл олган, барчаси Ўзбекистон фуқаролари», деб таъкидлади Базба.

Хабарда ўзбекистонликларнинг исми-шарифи келтирилмаган.

Абхазия - Жанубий Кавказдаги Қора денгизнинг шарқий қирғоғида жойлашган минтақа. Пойтахти – Сухум. Гуржистон Абхазияни Россия томонидан вақтинча босиб олинган ўз ҳудуди деб билади. Абхазия ўзини мустақил давлат деб ҳисоблайди (қисман тан олинган – саноқли давлатлар унинг мустақиллигини тан олган). Халқаро ҳамжамиятнинг аксарият қисми Абхазияни Гуржистоннинг бир қисми деб билади.