MSC раиси ўринбосари: Украина мағлубияти ЕИни кучсиз глобал ўйинчига айлантиради

Мюнхен хавфсизлик конференцияси (MSC) раисининг ўринбосари Бенедикт Франке Европа давлатларини Россия бошлаб берган Украинага қарши урушда бу мамлакатнинг мағлуб бўлишига йўл қўймасликка чақирди.

«Бу (мағлубият) бизнинг глобал ўйинчи сифатидаги нуфузимизни заифлаштиради, шунинг учун биз Украина бу урушда ютқазишига йўл қўймаслигимиз керак», — деди Франке душанба куни, 24 ноябрда, Йоханнесбургда ўтган G20 саммитида DW'га берган интервюсида.

Европа ҳар доим «ҳудудий суверенитет ва ҳамфикр мамлакатларни қўллаб-қувватлаш каби принципларни ҳимоя қилиб келган» бир пайтда, ўз ваъдаларини бажармай қолса, «армияларимиз билан жойларда қилаётган барча ишларимиз, ҳарбий чақириқ, харажатларимиз маъносиз бўлиб қолади», дея таъкидлади DW суҳбатдоши.

Европа, агар АҚШ Киевга ёрдамдан воз кечса, Украинага ушбу урушда ғалаба қозониши учун зарур қўллаб-қувватлашни кўрсата оладими, деган саволга Франке ижобий жавоб берди. «Бизда молиявий имкониятлар бор ва, ўйлашимча, аҳоли орасида ҳам зарур даражада сиёсий ирода мавжуд», — деди Бенедикт Франке.

Россиянинг Украинага қарши урушини тўхтатиш бўйича музокараларни шарҳлар экан, MSC раисининг ўринбосари «ҳаммаси бошқачароқ кечганини, европаликларни ҳаракат қилишга ва бирлашишга мажбур этиш учун ҳар доим ҳам АҚШдан шундай кутилмаган ташаббуслар талаб қилинмаслигини» исташини айтди. Шу билан бирга, у Женевада АҚШ, Украина ва ЕИ вакиллари ўртасида АҚШнинг «тинчлик режаси»ни қайта ишлаш бўйича ўтказилган учрашув тинчлик музокараларига «янги туртки берганини» тан олди.

«Биз позицияларнинг мустаҳкамланаётганини кўряпмиз. Ҳозирда Европанинг бирдамлигини кўряпмиз. Демак, бу яхши», — дея қайд этди Франке.