Ўзбекистон дунёда сайёҳлар оқими энг тез ўсаётган мамлакатлар қаторига кирди

2025 йилнинг январ-сентябр ойлари якунига кўра, Ўзбекистонга халқаро туристлар оқими 2019 йилнинг мос даврига нисбатан 73 фоизга ошган. Бундан яхшироқ натижалар фақат Бутан (+203 фоиз), Қатар (+138 фоиз), Эл Салвадор (+88 фоиз), Албания (+83 фоиз) ва Баҳрайнда (+76 фоиз) қайд этилган.

Фото: Kun.uz

Бутунжаҳон туризм ташкилоти томонидан эълон қилинган сўнгги таҳлилий маълумотларга кўра, Ўзбекистон 2025 йилнинг январ-сентябр ойларида хорижий сайёҳларни жалб қилиш бўйича дунё миқёсида энг юқори ўсиш қайд этилган топ-7 давлатлар қаторига кирди.

Хусусан, мамлакатга ташриф буюрган халқаро туристлар оқими 2019 йил даражасига нисбатан 73 фоизга ошган. Бу борада Ўзбекистонга нисбатан яхшироқ натижалар фақат Бутан (+203 фоиз), Қатар (+138 фоиз), Эл Салвадор (+88 фоиз), Албания (+83 фоиз) ва Баҳрайнда (+76 фоиз) қайд этилган.

Шунингдек, жорий йилнинг 9 ойида Ўзбекистонга келган халқаро туристлар сони 2024 йилнинг мос даврига нисбатан 13 фоизга кўпайган. Бу Европа минтақасида Исроил (+23 фоиз), Финландия (+15 фоиз) ва Норвегиядан (+14 фоиз) кейинги энг яхши тўртинчи кўрсаткич.