Дубай АҚШ ва Исроилнинг Эронга қарши урушига тортилгач кескин тушиб кетган сайёҳлар сонини қайта тиклашга ҳаракат бошлади. Шу мақсадда, амирликка оиласи ва дўстларини жалб қилган резидентларга пул мукофоти беришни таклиф қилмоқда.
Иқтисодиёт ва туризм департаменти ташаббуси бўлган «Dubai Invite» (Дубайга таклиф) дастури доирасида Бирлашган Араб Амирликлари фуқаролари ёки резидентларига ўз дўстлари ва қариндошларини номзод сифатида кўрсатиши мумкин. Меҳмонлар ташриф буюрган тақдирда таклиф қилувчи томон тахминан 816 доллардан (3 000 БАА дирҳами) ортиқ қийматдаги имтиёзларни олиши мумкин бўлади.
«Visit Dubai» веб-сайтида айтилишича, резидентлар меҳмонхонада яшаш, ресторан чегирмалари ва диққатга сазовор жойларга чипталарни ўз ичига олган «имтиёзлар пакети»ни қўлга киритади.
Имтиёзнинг шартлари
Дубай Иқтисодиёт ва туризм департаментининг янги кампанияси аслида сайёҳларни эмас, уларни таклиф қилган БАА резидентлари ва фуқароларини мукофотлайди.
Таклиф қилинган меҳмонлар эса 2026 йил 20 июлдан 31 октябргача Дубайга келиши керак. Меҳмонлар БААда яшовчи — резидент бўлмаслиги, амалдаги туристик виза билан келиши ва фақат бир марта номзод сифатида кўрсатилган бўлиши керак.
Резидентлар ўз меҳмонлари келишидан олдин дастурнинг онлайн ариза шакли орқали уларни рўйхатдан ўтказади. Меҳмон Дубайга кириши билан унинг келгани автоматик равишда тасдиқланади. Резидент эса 800 доллардан кўпроқ қийматга эга мукофотлар пакетига кириш ҳуқуқини олади.
Иштирок этаётган брендлар сирасига меҳмонхоналар, транспорт провайдерлари ва турли кўнгилочар компаниялар киради.
Маҳаллий ОАВга кўра, дастур амалдаги Emirates ID картасига эга бўлган, 18 ёш ва ундан катта БАА резидентлари ҳамда фуқаролари учун очиқ. Дастлабки 48 соат ичида ушбу лойиҳа 10 000 дан ортиқ аризаларни жалб қилгани айтилмоқда.
АҚШ-Эрон туризмга таъсири
The Guardian'нинг ёзишича, ушбу дастур АҚШ-Эрон урушига тортилганидан сўнг БАА туризм соҳаси жиддий таназзулни бошдан кечираётган бир вақтда йўлга қўйилмоқда.
Февраль ойида Эрон БААдаги АҚШ ҳарбий объектларига ракеталар ва дронлар билан жавоб зарбалари берди. Ушбу зарбалар дунёга машҳур Fairmont меҳмонхонаси ва Дубай халқаро аэропортига тегди. Оқибатда Дубайнинг инфлюенсерлар ҳамда ўта бойларга сотган «хотиржам ва тилла безакли хавфсиз ўйингоҳ» қиёфаси чил-парчин бўлди.
