Мерц: Украина учун ишончли хавфсизлик кафолатлари — тинчликнинг “нархи”

Украинага қарши Россия томонидан бошланган уруш тугаганидан сўнг, Украина учун ишончли хавфсизлик кафолатлари тинчликнинг “нархи”га айланиши керак. Бу ҳақда Германия Федерал Республикаси канцлери Фридрих Мерц 17 декабр, чоршанба куни Бундестагдаги “ҳукумат соати” давомида маълум қилди. Айни пайтда у Украина ва Россия ўртасида эҳтимолий тинчлик келишувига риоя этилишини таъминлаш вазифаси юклатилиши мумкин бўлган “кўпмиллатли кучлар” миссиясида Бундесвер ҳарбий хизматчилари қатнашадими-йўқми, буни аниқ айтмади. Бундай миссияни тузиш масаласини Брюсселда 18 декабр куни очиладиган Европа Иттифоқи саммитида Европа мамлакатларининг сиёсий етакчилари ҳал қилади. “Бу дунёда шундай саволлар борки, сиз эҳтимол тасаввур қилаётгандирсиз, уларга жавоб бериш унчалик ҳам осон эмас. Бу савол ҳам шундайлардан бири”, — деди канцлер ўнг популистик “Германия учун муқобил” партияси депутати Маркус Фронмайерга жавобан.

Мерц таъкидлашича, у “овоз ҳуқуқи”га эга экан, 2014 йилдаги “хатолар” — улар қаторида Минск келишувлари ҳам бўлган — такрорланишига йўл қўймайди. Германия ҳукумати Украинани қанча керак бўлса, шунча вақт қўллаб-қувватлашда давом этади, дея яна бир бор ишонтирди Фридрих Мерц.

Жанг ҳаракатлари якунланганидан кейин хавфсизлик кафолатлари масаласи 14 ва 15 декабр кунлари Берлинда Европа етакчилари, Украина президенти Володимир Зеленский, АҚШнинг махсус элчиси Стив Уиткофф ва АҚШ президентининг куёви Жаред Кушнер иштирокида бўлиб ўтган музокараларда асосий масалалардан бирига айланган.

Ҳозирча бундай кафолатлар қандай кўринишда бўлиши мумкинлиги аниқ эмас. Музокаралардан сўнг Европа етакчилари қўшма баёнот эълон қилиб, Ғарб мамлакатлари ҳарбий хизматчиларидан иборат “кўпмиллатли кучлар”ни ташкил этишга тайёр эканини билдирган. Бу кузатув миссияси Украина осмони ва денгизни ҳимоя қилиши, шунингдек Украина Қуролли кучларини тиклашни қўллаб-қувватлаши мумкин.

Германия, Франция, Буюк Британия, Италия, Полша, Финландия, Норвегия, Швеция, Нидерландия, Дания етакчилари, шунингдек Европа кенгаши ва Европа комиссиясининг баёнотига кўра, Европа Украинага келгусида қуролли ҳужум содир бўлган тақдирда “тинчлик ва хавфсизликни тиклаш бўйича мажбуриятлар”ни ўз зиммасига олишга тайёр. “Бу чоралар қуролли кучларни қўллашни, разведка ва моддий-техник ёрдамни, иқтисодий ҳамда дипломатик ҳаракатларни ўз ичига олиши мумкин”.