Тошкентда танишини ҳимоя қилишга уринган шахс кучли зарбадан сўнг комага тушиб қолди

16 мартга ўтар кечаси, тунги соат 02:30 атрофида Тошкент шаҳри Яккасарой туманида жойлашган ресторанлардан бирида муштлашув содир бўлган. Видеода бир эркак бошқа фуқаро томонидан йўлланган зарбалардан кейин ҳушини йўқотиб йиқилганини кўриш мумкин.

Тошкент шаҳар ИИББ ижтимоий тармоқларда тарқалган видеолар юзасидан берган муносабатида айтилишича, мижоз сифатида келган 30 ёшли Акмал Шукуров ўзининг таниши, 40 ёшли Хуршид билан ўртада келиб чиққан низо сабабли ўзаро жанжаллашган. 35 ёшли Борис эса уларни ажратишга ҳаракат қилган вақтида Акмал уни уриб тан жароҳати етказган.

Тарқалган видеоларда 12 (Twelve) номли тунги клуб жойлашган The Tower меҳмонхонаси олдида Акмал Борисга икки бор мушт туширгани, жабрланувчи ҳушидан кетиб йиқилганини кўриш мумкин. Тажовузкор шахс шундан кейин ҳам ҳаракатларини давом эттириб, Хуршидга ҳамла қилган, аёллардан бирини, Катяни ҳам калтаклаган.

Бошқарма хабарига кўра, Борис бош мия жароҳати, ўнг юзидан лунжи йиртилган жароҳати ва спиртдан заҳарланиш ташхиси билан шифохонага олиб ётқизилган.

Ҳолат юзасидан Яккасарой тумани ИИО томонидан Жиноят кодексининг 277-моддаси (Безорилик) билан жиноят иши қўзғатилган. Ҳозирда тергов ҳаракатлари давом этмоқда.

Жабрланувчининг яқинларидан бири Instagram саҳифасида хабар қилишича, унда тезкор равишда 5 соатлик мия трепанацияси операцияси ўтказилган, сўнгра сунъий комага туширилган. Ҳозирда унинг ҳаёти хавф остида. Шифокорлар у ўлим хавфи остидалиги ёки бутунлай ногирон бўлиб қолиш эҳтимоли мавжудлигини айтишган.