Ногиронлиги бор аёл коинотга парвоз қилди

Оёқлари фалаж бўлган германиялик аёл Blue Origin ракетасида беш нафар йўловчи билан коинотга 10 дақиқалик парвозни амалга оширди. 

«Бу энг зўр тажриба бўлди!» — деди Михаэла Бентхаус парвоздан сўнг. 

У етти йил аввал тоғ велосипедида ҳалокатга учраши оқибатида умуртқасидан жароҳатланганди, лекин бу унинг коинотга парвоз қилиш ҳақидаги орзуси амалга ошишига тўсқинлик қилмади. 

«Менга нафақат манзара ва микрогравитация, балки парвоз жараёнининг ўзи ҳам ёқди. Парвознинг ҳар бир босқичи ажойиб бўлди», — деди у.

Бентхауснинг сўзларига кўра, у велоҳалокатдан сўнг имконияти чекланган инсонлар учун «дунё қанчалар қўл етмас бўлиб қолишини англаб етган». 

Михаэла Бентхаус Европа космик агентлигида аэрокосмик ва мехатрон тизимлар бўйича муҳандис бўлиб ишлайди.