«Манчестер Юнайтед» Рубен Аморим асосий жамоа бош мураббийлигидан истеъфога чиққанини эълон қилди.
Бу истеъфо португалиялик мутахассис 4 январ куни «Лидс» билан ўйиндан кейин (1:1) ўтказилган матбуот анжумани вақтида клуб спорт директори Жейсон Уилкокс билан ўртада зиддият борлигига ишора қилганди; у бош мураббий эмас, балки менежер эканига урғу қаратган; шунингдек, истеъфога чиқмаслиги ва «яқин 18 ой ичида ёки уни алмаштиришга қарор қилишмагунича айнан менежер сифатида ишлаши»ни айтганди.
«Қайтараман, мен менежер бўлишни хоҳлайман, бош мураббий эмас. Тухел, Конте ёки Моуринио эмас исмим, лекин “Манчестер Юнайтед” менежериман ва ҳеч қаерга кетмоқчи эмасман. Шартномага кўра яна бир ярим йил шу ишни қиламан, кейин ҳамма ўз йўлига кетаверади. Спорт директори ҳам, скаутинг бўлими ҳам, мен ҳам ўз ишимизни қилcак кифоя.
Агар Гари Невиллнинг танқидлари кимнидир хавотирга солса, клубни алмаштириши керак», – деганди у.
Клуб эса расмий хабарида у менежерликдан эмас, айнан «бош мураббийликдан истеъфога чиқарилгани»га урғу қаратди.
Катта эҳтимол билан, у ва спорт директори ўртасида қишда янги трансферлар қилиш-қилмаслик масаласида зиддият юзага келган. Ҳозирда клубда қатор асосий таркиб футболчиларидан фойдалана олмаяпти (Бруно Фернандеш, де Лиҳт, Коби Майну жароҳатланган, яна уч муҳим футболчи – Амад, Мазравий ва Мбеумо Африка кубогига кетган) ва сўнгги турларда мураббийнинг танлов имкониятлари ҳаддан ташқари чекланганди.
Аморим «МЮ»да 2024 йил ноябрида Эрик тен Ҳааг ўрнига иш бошлаганди. Португалиялик ушбу мутахассис бунгача Лиссабоннинг «Спортинг» клубида ишлаган ва ушбу жамоа билан Португалия чемпионатида ғолиб чиққанди.
«Қизил иблислар» ўтган мавсумни 15-ўринда якунлаган, жорий мавсумда эса 20 турдан кейин 31 очко (8 ғалаба, 7 дуранг, 5 мағлубият) тўплаган ҳолда турнир жадвалининг 6-поғонасида бормоқда. Манкунианликлар пешқадам «Арсенал»дан 17 очкога ортда қолиб кетишган.
Аморим жами 63 та ўйинда «қизил иблислар»га устозлик қилди. Бу ўйинларнинг 25 тасида ғалаба, 15 тасида дуранг, 23 тасида мағлубият қайд этилди. Унинг бошқарувида жамоа Европа Лигаси финалига чиқди, аммо финалда «Тоттенҳэм»га ютқазди.
«Манчестер Юнайтед» АПЛнинг кейинги турида «Бёрнли» меҳмони бўлади. Ушбу ўйинга жамоани мавсум якунига қадар вақтинча мураббий этиб тайинланган Даррен Флетчер бошқариб боради.
