Статистика: кийим ишлаб чиқаришда Андижон биринчи ўринда

Миллий статистика қўмитаси эълон қилган маълумотларга мувофиқ, 2025 йилнинг январ–ноябр ойларида Ўзбекистонда йирик корхоналар томонидан 37,9 трлн сўмлик кийимлар ишлаб чиқарилган. Қайд этилишича, ушбу кўрсаткич 2024 йилнинг шу даврига нисбатан 24,3 фоизга ошган.

Ҳудудлар кесимида эса кийим ишлаб чиқариш бўйича энг юқори кўрсаткич Андижон вилоятига тўғри келган — 17,2 трлн сўм. Кейинги ўринларни Наманган вилояти (3,7 трлн сўм) ва Тошкент вилояти (3,6 трлн сўм) эгаллаган. Тошкент шаҳрида бу кўрсаткич 2,6 трлн сўмни ташкил этган.

Шунингдек, Фарғона вилоятида 2,2 трлн сўмлик, Навоий вилоятида 1,9 трлн сўмлик, Қашқадарё вилоятида 1,6 трлн сўмлик, Бухоро вилоятида 1,5 трлн сўмлик кийим маҳсулотлари ишлаб чиқарилган. Самарқанд вилоятида ушбу йўналишдаги ишлаб чиқариш ҳажми 1,2 трлн сўмга тенг бўлган.

Қолган ҳудудларда кўрсаткичлар қуйидагича қайд этилган: Сурхондарё вилояти — 562 млрд сўм, Жиззах вилояти — 524,1 млрд сўм, Қорақалпоғистон Республикаси — 497,4 млрд сўм, Сирдарё вилояти — 390,6 млрд сўм, Хоразм вилояти — 387,8 млрд сўм.

Маълумотларга кўра, келтирилган рақамлар 2025 йилнинг 11 ойи — январдан ноябргача бўлган даврни қамраб олади.