Украина Бош прокуратураси Леонид Волковга нисбатан иш очди

Россиянинг Sota нашри аввалроқ хабар беришича, мухолифатчига нисбатан иш Россиянинг қуролли тажовузини “оқлаш” моддаси билан (Украина Жиноят кодекси 436-2-моддаси 3-қисми) қўзғатилган. Нашр, даъво қилинишича, “Украина Бош прокурорлиги офисининг аризачилардан бирига жавоби” скриншотини эълон қилди. Ҳужжат 13 январ санаси билан расмийлаштирилган, бироқ унда Волковнинг исми тилга олинмайди.

Россиялик мухолифатчига нисбатан жиноят иши қўзғатилгани ҳақида Украинадаги “Главком” нашри ҳам Судгача терговлар ягона реестри маълумотларига таяниб хабар берган. У ерда иш ҳарбийларнинг шаъни ва қадр-қимматини ҳақорат қилиш моддаси билан ҳам (Украина Жиноят кодекси 435-1-моддаси) очилгани айтилган. Қарор “Халқ хизматкори” партиясидан Олий Рада депутати Олга Василевская-Смаглюк мурожаатидан сўнг қабул қилингани қайд этилган.

Иш қўзғатилишига сабаб 5 январ куни КҚЖнинг собиқ ходими Анна Тирон томонидан эълон қилинган маълумот бўлган. У ҳозир Украина томонида жанг қилаётган “Рус кўнгиллилар корпуси” (РКК)да ишлайди. Тирон Facebook’да Леонид Волков унга аввалроқ юборган шахсий хабарни жойлаштирган: бу хабар РКК асосчиси, ўта ўнг қарашларга эга Денис Капустиннинг ўлими ҳақидаги хабардан кейин йўлланган бўлиб, ўша пайтда унинг “ўлими саҳналаштирилгани” ҳали маълум эмас эди.

Бу хабарда мухолифатчи, жумладан, Капустиннинг ўлимини маъқуллаган, РККни “сохта ‘корпус’” деб атаган ва у “қишлоқча, пасткаш сиёсий технолог (илгари — Украина разведкаси раҳбари, ҳозир — Украина президенти офиси раҳбари) Будановнинг шубҳали ишларни ҳал қилганини” ёзган. Волков, шунингдек: “Умид қиламан, Капустиндан кейин унинг шериклари ҳам кетади. Ермак қамалади, Подоляк қамалади, Буданов қамалади ва бошқа барча пропагандачи, иккиюзламачи ўғри-талончилар ҳам”, — деб ёзган.

Кейинроқ мухолифатчи ўз матнини “ҳиссиётга берилган ва кескин” деб атаган ҳамда уни “ёзмаслик керак эди” деган. Шу билан бирга, у “неонацистларга ёмон қараши”ни таъкидлаган. Ҳозир Литвада яшаётган Волковнинг сўзларини текшириш билан, миграция хизмати мурожаатидан кейин, ушбу мамлакат Давлат хавфсизлиги департаменти шуғулланмоқда. Ҳокимият унинг баёнотлари Литва хавфсизлигига таҳдид соладими-йўқми — шуни аниқламоқчи.