Сичуандан Тошкентга 300 тонна кўк чой: 10 та юк машинаси йўлга чиқди

Хитойнинг Сичуан провинцияси Цзяцзян уездидан Тошкентга умумий оғирлиги 300 тонна бўлган юқори сифатли кўк чой ортилган 10 та юк машинаси жўнатилди, дея хабар бермоқда “Дунё” АА.

Хитойнинг “Синхуа” ахборот агентлиги маълумотларига кўра, мазкур юк Сичуан провинцияси томонидан 2026 йилда экспортга йўналтирилган чойнинг биринчи партиясидир.

Қайд этилишича, юк машиналари Шинжон-Уйғур автоном туманидаги назорат-ўтказиш пункти орқали давлат чегарасини кесиб ўтади. Шундан сўнг Хитой–Қирғизистон–Ўзбекистон йўналиши бўйича ҳаракатланиб, Тошкентга етиб келиши режалаштирилган.

Агентликнинг таъкидлашича, сўнгги йилларда Цзяцзян ҳудудида чой саноати ишлаб чиқариш тузилмаси экспортга йўналтирилган тарзда қайта шакллантирилмоқда. 2025 йилда мазкур уезддан экспортга етказиб берилган чойнинг умумий ҳажми қиймат жиҳатидан тахминан 29 миллион АҚШ долларини ташкил этган.

Шунингдек, Цзяцзян уезди Сичуан провинцияси учун Ўзбекистондаги биринчи чет эл чой омборини ташкил этгани ва етказиб бериш географияси дунёнинг 20 га яқин мамлакат ва минтақаларини — жумладан, Россия, Марокаш ҳамда бошқа давлатларни қамраб олгани маълум қилинди.

2025 йил якунларига кўра, Ўзбекистоннинг Хитой билан ташқи савдо айланмаси 17,2 миллиард доллардан ошган, Хитойнинг Ўзбекистон ташқи савдосидаги улуши эса 21,2 фоизни ташкил этган.