Киев Венгрия элчисига норозилик билдирди

Украина Ташқи ишлар вазирлиги Венгрия элчиси Антал Гейзерни Будапештдаги раҳбариятнинг сўнгги баёнотлари — гўё Киев Венгриядаги парламент сайловлари жараёнига аралашгани ҳақидаги даъволари муносабати билан чақиртирди. Дипломатга Украина Венгрия томонининг уни Венгриядаги сайловолди кампаниясига тортишга уринишларига қатъий қарши экани билдирилди, бу ҳолат “икки томонлама муносабатлар ривожига очиқдан очиқ зарар етказади”, дейилади Украина вазирлиги чоршанба, 28 январ куни тарқатган баёнотда.

Баёнотда таъкидланишича, “Венгрия томони қўшни икки давлат ўртасидаги муносабатлар учун салбий оқибатларнинг олдини олиш мақсадида агрессив антиукраин риторикани тўхтатишга чақирилди”. Киев, шунингдек, Украинанинг “Венгрия билан конструктив ҳамкорликни ривожлантиришга тайёр” эканини қайд этди. Шу билан бирга, Украина ТИВ Венгрия ҳокимиятини Евроиттифоқнинг Украина билан ЕИга аъзолик бўйича музокараларни бошлаш ҳақидаги қарорини тўсиб турган ветони бекор қилишга яна бир бор чақирди. Бу, Киев фикрича, “икки халқ манфаатларига ҳамда Украинадаги венгер озчилиги манфаатларига ҳам мос келган бўлар эди”.

Будапештдаги ҳукумат апрел ойига белгиланган парламент сайловларида Украина Венгрия мухолифатига ёрдам беряпти, деб ҳисобламоқда. Венгрия ташқи ишлар вазири Петер Сийярто Facebook’да украинлар “Ҳурмат ва эркинлик” (TISZA) мухолифат партияси фойдасига “очиқ ва қўпол аралашув”ни давом эттираётганини ёзди.

2010 йилдан бери ҳокимиятда бўлиб келаётган Венгрия бош вазири Виктор Орбан илк бор сайловда кучли рақибга дуч келмоқда. Сўровномаларга кўра, Петер Мадяр етакчилигидаги ўнг-марказчи TISZA партияси Орбаннинг ўнг ФИДЕС партиясидан олдинда бормоқда.