Хоразм вилояти ҳокимига янги биринчи ўринбосар тайинланди

Хоразм вилояти ҳокимлигида кадрлар ўзгариши амалга оширилди. Анвар Кенжаевич Давлетов вилоят ҳокимининг молия–иқтисодиёт ва камбағалликни қисқартириш масалалари бўйича биринчи ўринбосари лавозимига тайинланди.

Фото: ЎзА

А.Давлетов тайинловга қадар вилоят ҳокимининг ўринбосари – инвестициялар, саноат ва савдо бошқармаси бошлиғи сифатида фаолият юритиб келган. Ушбу лавозимда ҳудудга инвестицияларни жалб қилиш, саноат корхоналари фаолиятини мувофиқлаштириш, ташқи савдо ҳажмини ошириш ва янги иш ўринлари яратиш йўналишларида иш олиб борган.

Янги лавозимида Давлетов молиявий барқарорликни таъминлаш, маҳаллий бюджет даромадларини кўпайтириш, тадбиркорликни қўллаб-қувватлаш ҳамда аҳоли бандлигини оширишга қаратилган дастурлар ижросини мувофиқлаштиради. Шунингдек, камбағалликни қисқартириш бўйича ҳудудий “йўл хариталари”ни амалга ошириш, манзилли ижтимоий ёрдам механизмларини такомиллаштириш ва иқтисодий лойиҳалар самарадорлигини ошириш унинг асосий вазифаларидан бири бўлади.

Қайд этилишича, мазкур тайинлов ҳудуд иқтисодиётини янада ривожлантириш ва аҳоли фаровонлигини оширишга қаратилган чора-тадбирлар изчиллигини таъминлаш мақсадида амалга оширилди.