“Юзимни бузиб қўйишди” – Тошкентда сохта косметологлар жиноий жазога тортилди

Тошкентда сохта косметолог эр-хотин жиноий жазога тортилди. Kun.uz суд ҳужжати билан танишди.

Суд ҳукмига кўра, 41 ёшли Ф.Р. ҳамда унинг 38 ёшли турмуш ўртоғи олий тиббий маълумотга эга бўлмаган ҳолда Чилонзор туманидаги кўп қаватли уй ертўласида жойлашган косметологик марказида пластик амалиётларни бажариб келган. Улар терини кесиш билан боғлиқ пластик амалиётни бажаришларини ижтимоий тармоқларда реклама қилиб келишган.

2025 йил 3 апрел куни эр-хотин уларнинг рекламасига ишониб келган мижозни ҳаёти ёки соғлиғи учун хавфли тарзда пластик операция қилган. Бунинг оқибатида аёлнинг пешона ва кўзлари атрофи йиринглаб, табиийлигини йўқотган, юзи эса хунуклашиб қолган. 

Судга оид тиббий экспертизаси хулосасига кўра, бу каби муолажалар тиббиёт олийгоҳини тамомлаган олий тоифали пластик жарроҳ томонидан амалга оширилиши керак: косметолог ёки тиббиёт олийгоҳида ўқиётган талаба томонидан ўтказилиши нотўғри ҳисобланади. Эр-хотин мижозда икки қулоқ олди юзаси чакка соҳалари терисини тортиш мақсадида кесиб, жарроҳлик операцияси ўтказишган. Операциядан кейин жароҳат йиринглаб кетиши оқибатида мижоз узоқ вақт косметологларга қатнаб, даволанган. Аёл кўрикдан ўтказилганда унинг операциядан кейинги жароҳати тўлиқ битмаган ҳолатда бўлган ва ярадан суюқлик ажралиши кузатилган.Жиноят ишида яна бир аёл жабрланувчи бўлган. Эр-хотин уни 2025 йил 22 июн куни пластик операция қилган. Оқибатда ушбу мижознинг ҳам пешона ва кўзлари атрофи йиринглаб, табиийлигини йўқотган.

Эр-хотин судда айбига тўлиқ иқрор бўлган.

“Ўзим Москвада тиббий университетида билим олдим, аммо диплом олишга улгурмадим. Машҳур жарроҳ Тимур Ҳайдаровнинг шогирди бўламан. Ҳозирда Қирғизистон тиббий университетида сиртдан таълим оламан. Тошкентдаги “D косметология” ёнидан бир хона ижарага олиб, видеоларга тушган ҳолда ижтимоий тармоқларда намойиш қилдим. Олдимга келган шахсларга хижома, зулук қўйиш, юз, лабни шишириш, татуаж ва бошқа хизматларни кўрсатиб келдим. Турмуш ўртоғим бўш вақтларида келиб, менга ёрдам бериб турган.

 2025 йил 22 июн куни мижоз юзини пластик операция қилдирмоқчи бўлди. У операцияга розилиги бўйича тилхат ёзиб берди. Эрим мижознинг юзини кесди, қолган ишларни мен бажардим. Мижоз каттароқ кесишни сўради. Биз унга кўзи очилиб қолишини айтдик. У ҳеч нарса бўлмайди, кесаверинг, деди. Эрим аёлнинг юзини каттароқ кесди, мен эса тикиб қўйдим.

Мижоз хурсанд бўлди. Лекин орадан вақт ўтгач, у норози бўлиб, шантаж қилиш йўлига ўтди ва пулини қайтариб бермасак, устимиздан шикоят қилишини айтди. Биз унга ўзи берган 400 долларни қайтардик. Орадан бир ҳафта ўтгач, мижоз яна норози бўлиб келди ва биз операция қилиб, унинг юзини тўғрилаб бердик”, деган сохта косметолог суддаги ўз кўрсатмасида.

Ҳар икки жабрланувчи аёл сохта косметолог эр-хотинни ижтимоий тармоқлардаги рекламалари орқали топиб боришганини, улар юзларини бузиб қўйганини, тан жароҳати олишганини айтган.

Жиноят ишлари бўйича Чилонзор туман судининг 2026 йил 28 январдаги ҳукми билан эр-хотин Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) 2-қисми “б,в,г” бандларида назарда тутилган жиноятни содир қилишда айбли деб топилган. Аёлга 3 йил озодликни чеклаш, эркакка эса 3 йил озодликдан маҳрум қилиш жазоси тайинланган. Тайинланган жазони манзил колонияларда ўташ белгиланган ва эркак суд залидан қамоққа олинган.

Аввалроқ Тошкентда сохта косметолог хавфли рецидивист бўлиб чиққанди.