«Реал» чемпионлик пойгасида қолди, «Интер», «Бавария» ва «ПСЖ» рақибларини йўқ қилмоқда

Испания: Каррерас қутқарди

«Валенсия» – «Реал» 0:2
Голлар: Каррерас, 65 (0:1). Мбаппе, 90+1 (0:2)
«Валенсия»: Димитриевски, Копете, Эрай Жемерт, Хосе Гайя, Нунес (Коррейа, 73), Пепелу (Родригес, 73), Угринич (Герра, 81), Груневелд, Риоха (Содиқ, 81), Дуро, Белтран (Рамазоний, 81)
«Реал»: Куртуа, Раул Асенсио, Ҳаусен, Каррерас, Ҳименес (Александр-Арнолд, 76), Тшуамени, Камавинга, Валверде (Сестеро, 90+2), Мбаппе, Гарсия (Диас, 76), Арда Гулер (Мастантуоно, 82)
Огоҳлантиришлар: Копете, 88 – Каррерас, 69

«Барселона» шанба кунги ўйинда «Малйорка» устидан ишончли ғалабага эришганди (3:0), шу туфайли «Реал» пешқадам билан орадаги минимал фарқ сақланиб қолиши учун ўз ўйинида ғалаба қозониши талаб этиларди. Ва бу ишни жароҳат туфайли сафдан чиққан Беллингҳэм ва Родриго, шунингдек, дисквалификацияга учраган Винисиуссиз уддалаш керак бўларди.

Алваро Арбелоа бошланғич таркибда туширган футболчилар эса биринчи бўлимда деярли ҳеч нарса қила олишмади. Дастлабки 45 дақиқаликда ёдда қоларли кам сонли вазиятлардан бири 28-дақиқада Мбаппе 21 ёшли Хименесни яхши вазиятга чиқариши бўлди, аммо шу куни «Реал» асосий таркибида ла лигада дебют қилган ёш футболчининг зарбаси мезбонлар дарвозабонига қийинчилик туғдирмади.

Ҳакам бўлимга бирор дақиқа қўшиб бермагани ҳам биринчи бўлим қанчалик зерикарли кечганини тасдиқлайди.

Жамоалар иккинчи бўлимни ҳам жуда суст бошлашди. 60 дақиқага келиб жамоаларда xG кўрсаткичи жуда ғарибона кўринишда эди: «Валенсия»да 0,20, «Реал»да 0,32.

Ҳужумчиларнинг ишлари юришмаганда эса одатда ҳимоячилар барчасини ўз зиммасига олади ва бу сафар ҳам шундай бўлди. 65-дақиқада Каррерас «Реал»ни ҳисобда олдинга олиб чиқди. Чап қанот ҳимоячиси  жарима майдонига ёриб кириб, рақибнинг уч футболчисини ортда қолдирди ва тўпни тўртинчисининг оёқлари орасидан ўтказиб, дарвоза тўрига йўллади.

71-дақиқада «Реал» гол ўтказиб юборишига бир бахя қолди, аммо Белтраннинг зарбасидан кейин тўп устунга борди. Бу мезбонларнинг ўйиндаги ягона вазияти бўлиб қолди. Бутун учрашув давомида Куртуа бирорта сейв амалга оширишига ҳожат бўлмади. «Реал» эса ўйинга қўшиб берилган дақиқаларда иккинчи голни ҳам урди. Браим чап қанот бўйлаб югурди ва тўпни жарима майдонига оширди, у ерда турган Мбаппе ҳеч қандай қаршиликка учрамасдан, дарвозани ишғол этди. Бу француз ҳужумчиси учун чемпионатнинг 22-ўйинидаги 23-гол бўлди.

«Реал» ҳамон «Барселона»ни бир очколик фарқ билан таъқиб этмоқда. «Валенсия»ни эса хавфли ҳудуддан атиги бир очко ажратиб турибди.

Италия: «Интер» 5 та гол урди

«Сассуоло» – «Интер» 0:5
Голлар: Биссек, 11 (0:1). Тюрам, 28 (0:2). Мартинес, 50 (0:3). Аканжи, 54 (0:4). Луис Энрике, 89 (0:5)
«Сассуоло»: Мурич, Идзес, Мухаремович, Дойг (Гарсия, 71), Валюкевич, Матич, Коне, Торстведт, Лоренте (Кулибали, 60), Берарди (Липани, 60), Пинамонти (Нзола, 71)
«Интер»: Зоммер, Аканжи, Бастони (Дармиан, 64), Биссек, Зелински (Фраттези, 64), Сучич, Мхитарян (Диуф, 71), Димарко, Луис Энрике, Тюрам (Бонни, 76), Мартинес (Эспозито, 76)
Огоҳлантиришлар: Матич, 54 – Димарко, 82
Четлатиш: Матич, 54 (иккинчи сариқ)

Фантастик мавсум ўтказаётган Димарко навбатдаги кучли ўйинини ўтказди. Январ ойида А Сериянинг энг яхши ҳимоячиси сифатида тақдирланган футболчи ўйин бошида дарвоза тўрига кириб кетаётган тўпни тўхтатиб қолди. Кейин эса унинг бурчакдан оширган узатмасини Биссека голга айлантирди. Федериконинг ўзида ҳам гол уриш учун бир неча вариантлар бўлди, лекин у яхшироқ уддалайдиган иш – голли узатмалар беришдир. Бўлим ўрталарида унинг қанотдан узатмасидан кейин Тюрам ҳам ўз номини таблога ёздириб қўйди. Димарко учун бу жорий мавсумдаги ўнинчи голли пасга айланди.

«Сассуоло» ўйинга интригани қайтариши мумкин эди, аммо мезбонларнинг биринчи бўлим охиридаги голи кичик офсайд туфайли бекор қилинди. Иккинчи бўлим бошида Лаутаро Мартинес жарима майдони марказида ҳаводаги тўп учун курашда ютиб чиқиб, иккинчи тегинишда дарвозани ишғол этганида амалда ўйин тақдири ҳал бўлди. Миланликлар сардори навбатдаги голидан кейин клуб тўпурарлари рўйхатида учинчи ўринга чиқиб олди (171 гол). Аммо ўйиннинг асосий қаҳрамони у эмас, Димарко бўлди, у Аканжига ҳам «Интер»даги илк голини уришда ёрдам бериб, ассистлар бўйича ҳет-трик қайд этди. Ўйиннинг сўнгги дақиқаларида эса жорий мавсум арафасида «Марсел»дан олиб келинган Луис Энрике Италиядаги илк голини уришга эришди. Кристиан Киву шогирдлари скудетто ғолиблиги учун асосий даъвогар бўлиб қолмоқда – иккинчи ўринда келаётган «Милан» (захирасида битта ўйин бор) билан орадаги фарқ 8 очкони ташкил этмоқда.

Германия: «Бавария» ҳам 5 та гол урди

«Бавария» – «Ҳоффенҳайм» 5:1
Голлар: Кейн, 20 – пеналти (1:0). Крамарич, 35 (1:1). Кейн, 45 – пеналти (2:1). Диас, 45+2 (3:1). Диас, 62 (4:1). Диас, 89 (5:1)
«Бавария»: Нойер, Упамекано, Та (Ито, 63), Дэйвис (Лаймер, 80), Станишич, Киммиҳ, Павлович, Гнабри (Мусиала, 63), Диас, Олисе (Карл, 63), Кейн (Жексон, 68)
«Ҳоффенҳайм»: Бауманн, Озан Кабак, Акпогума, Ҳайдари, Цоуфал, Премел, Авдуллаҳу (Журич, 81), Крамарич (Гендри, 71), Прасс (Моэрстедт, 81), Туре (Дамар, 71), Асллани (Бебу, 66)
Огоҳлантиришлар: Олисе, 13. Та, 59 – Прасс, 6. Авдуллаҳу, 44
Четлатиш: Акпогума, 17

«Бавария» сўнгги вақтларда камтарона рақибларга қарши ўйинларда ўзига ўзи муаммо яратиш билан машғул бўлмоқда. Мюнхенликлар аввалига ўз уйида «Аугсбург»га ютқазди, кейин «Ҳамбург» билан дуранг ўйнади, аммо пешқадамлар гуруҳида бораётган «Лейпциг» яксон этилди (5:1). Учинчи ўриндаги «Ҳоффенҳайм»га қарши ўйин эса Венсан Компани шогирдлари бундеслиганинг ўртамиёна ва кучсиз рақибларига қарши ўйнашдан зериккани, унга фақат номдор рақиблар кераклиги ҳақидаги назарияни исботлаш учун навбатдаги синовга айланди.

Амалда барчаси кўринганидек осон кечмади. «Бавария» пеналти орқали анча эрта ҳисобни очган ва Акпогуманинг четлатилиши туфайли сон жиҳатдан кўпчилик бўлиб олганига қарамай, меҳмонлар анча жиддий қаршилик кўрсатишди. Мюнхенликлар мунтазам равишда хавфли вазиятлар яратган бўлса-да, жамоа мудофаа чизиғида вазият оғирлиги кўриниб қолмоқда. Фақат Озана Кабак бир неча метрдан тўғри зарба бера олмади, Ассланининг зарбасидан кейин тўп тўсинга борди, Крамарич яккама-якка вазиятга чиқиб келганида эса Нойер ақлбовар қилмас сейв ижро этди – «қишлоқилар» жамоаси амалда биринчи бўлимнинг ўзида бир неча гол уриб ташлаши мумкин эди.

Кучли прессинг орқали меҳмонлар барибир ўз мақсадига эришди ва Нойернинг тўп узатишдаги хатолиги Асслани тўпни эгаллаб олиши ва Крамарич иккинчи вазиятидан фойдаланиши билан якунланди.

Аммо бўлим охирида «Ҳоффенҳайм»нинг яна бир ҳимоячиси Цоуфал барчасини барбод қилди. Тажрибали ҳимоячи жарима майдони ичида Диасни йиқитди ва ўз жамоаси дарвозасига иккинчи бор пеналти белгиланишига сабабчи бўлди. Бир неча дақиқа ўтиб у колумбиялик ҳужумчига яна бир яккакурашни бой берди ва у осонлик билан учинчи голни уришига қўйиб берди. Нойер эса ўз айбини ювиб, яна бир ажойиб сейв ижро этган ҳолда рақибга ўйинга қайтиш имконини бермади.

Иккинчи бўлим бошида Диас иккинчи голни уриб, амалда ўйин тақдирини ҳал қилди, сўнгги дақиқаларда эса ҳет-трикни расмийлаштирди.

«Бавария» «Ҳоффенҳайм»нинг беш ғалабадан иборат сериясини тўхтатди ва энди Дортмунднинг «Боруссия» клуби билан орадаги фарқни олти очкога етказди. Ушбу икки жамоа 28 феврал куни Дортмундда чемпионлик ўйинида майдонга тушади.

Франция: «ПСЖ» ҳам 5 та гол урди

«ПСЖ» – «Марсел» 5:0
Голлар: Дембеле, 12 (1:0). Дембеле, 37 (2:0). Медина, 64 – автогол (3:0). Кварацхелия, 66 (4:0). Ли Кан Ин, 74 (5:0)
«ПСЖ»: Сафонов, Маркинос, Пачо, Нуну Мендеш, Заир-Эмери (Эрнандез, 75), Витиня, Маюлу (Фернандес, 75), Жоау Невеш, Барколя (Ли Кан Ин, 68), Дуэ (Кварацхелия, 62), Дембеле (Рамуш, 75)
«Марсел»: де Ланге, Балерди, Медина, Павар (Абделли, 62), Ҳейберг, Тимбер, Эмерсон, Веа, Гринвуд (Надир, 80), Нванери (Пайшао, 46), Гуири
Огоҳлантиришлар: Витиня, 9. Заир-Эмери, 59 – Эмерсон, 82. Балерди, 90

Франция чемпионатининг 21-туридаги марказий учрашув «ПСЖ» ва «Марсел» ўртасида кечди. Кучли тўртлик учун курашаётган ушбу рақиб бу мавсумда икки бор парижликларга жанг таклиф қилганди: чемпионатнинг биринчи даврасида ўз майдонида ғалаба қозонган, Суперкубок учун баҳсни эса пеналтилар сериясигача олиб борганди. Жанубликларнинг бу ўйиндаги ғалабаси олтин учун пойгада интригани кучайтирган бўларди: «Ланс» биринчи ўринга чиқиши, «Марсел» эса «ПСЖ» билан орадаги фарқни 6 очкога қисқартириши мумкин эди.

Аммо буларнинг барчаси қоғозда қолди ва парижликлар илк дақиқалардан ҳужумга ташланиб, дастлабки 12 дақиқа ичида учта голли вазият яратди – Дуэ ва Барколя ўз вазиятларидан фойдалана олмаган бўлса-да, Дембеле Нуну Мендешнинг узатмасидан кейин ҳисобни очди.

37-дақиқада эса Дембеле бежиз «Олтин тўп» олмаганини намойиш этди: у рақиб жарима майдони ичида ажойиб дриблинг ишлатди ва ҳимоячиларни йўлдан олиб, дарвозанинг яқин бурчагини аниқ нишонга олди – 2:0.

Иккинчи бўлимни ҳам мезбонлар биринчиси каби ҳужумкор бошлади: Дуэ ва Барколянинг зарбаларидан кейин тўп турли устунларга борди, Дезире эса 54-дақиқада Мендешнинг қанотдан узатмасидан кейин тўпни бўш дарвозага киритиб юбора олмади.

Навбатдаги эпизодда эса Барколя яккама-якка вазиятдан фойдалана олмади, аммо уч дақиқа ўтиб меҳмонлар ўзи ёрдам бериб юборди – Медина ўз дарвозасини ишғол этиб қўйди.

Икки дақиқа ўтиб Кварацхелия ҳисобни 4:0 кўринишига келтирди.

Ўйинга якуний нуқтани эса Ли Кан Ин қўйди – 5:0.

Тотал устунликка эришган «ПСЖ» турнир жадвалидаги пешқадамликни сақлаб қолди, ашаддий рақибдан учралган шармандали мағлубият эса Роберто Де Дзерби «Марсел»дан кетишига олиб келиши мумкин.