Италиянинг Милан ва Кортина-д’Ампеццо шаҳарларида бўлиб ўтган 25-қишки Олимпия ўйинларининг ёпилиш маросими Веронадаги Arena di Verona’да — милодий тахминан 30 йиллар атрофида қурилган Рим амфитеатрида якшанба, 22 феврал куни кечқурун бўлиб ўтди. Турли баҳоларга кўра, “Гўзаллик амалий ҳаракатда” (Beauty in Action) шиори остида ўтган маросимни трибуналардан 8–12 минг нафар томошабин кузатган. Спортчилар парадида эса тахминан 1,5 минг нафар олимпиадачи — ўйинларда қатнашганларнинг ярмидан сал кўпроғи иштирок этди.
Икки ярим соат давом этган хайрлашув маросими италян операсига, шунингдек ҳам классик, ҳам замонавий рақсларга бағишланди. Барчаси “Операдаги тун” номли қисқа метражли фильмдан бошланди: унда Жузеппе Вердининг “Аида” ва “Риголетто” опералари қаҳрамонлари кўрсатилди. Кейин бу персонажлар аренада пайдо бўлиб, гўё “жонланди”. Маросимда, жумладан, италян қўшиқчиси Акилле Лауро, дижей Габри Понте ва балет артисти Роберто Болле ҳам иштирок этди.
Веронада ҳайвонларга зарари сабабли фейерверклар тақиқлангани учун маросимда фейерверк ўрнига ёруғлик шоуси намойиш этилди. Ташкилотчилар умуман олганда ўз мақсадларидан бири сифатида “тарихдаги энг экологик ўйинлар”ни ўтказишни атаган.
Спортчилар парадида Олимпиадада қатнашган барча 92 мамлакат вакиллари бор эди. Германия байроғини чаначилар Тобиас Вендл ва Тобиас Арлт кўтариб чиқди: уларнинг ҳар бири биттадан олтин (эстафетада) ва биттадан бронза медалини (жуфтликда) қўлга киритган. Бироқ Олимпиадада беллашган 185 немис атлетидан маросимда атиги 18 нафари иштирок этган.
Ўйинларда нейтрал байроқ остида қатнашган россиялик спортчилар ҳам парадда иштирок этди. 13 нафар россияликдан маросимда беш нафари бўлган: чанғичилар Савелий Коростелев ва Даря Непряева, фигурали учиш спортчилари Пётр Гуменник ва Аделия Петросян, шунингдек алпинист Никита Филиппов. Охиргиси ягона мукофотни олган россиялик бўлди: у кумуш медални қўлга киритди.
Нейтрал байроқ остидаги атлетларнинг парадда пайдо бўлиши кутилмаган ҳолат бўлди, чунки олдинроқ Халқаро олимпия қўмитаси (МОҚ) коммуникациялар бўйича директори Марк Адамс бундай спортчилар бу тадбирда иштирок эта олмаслигини айтган эди.
