2027 йилдан метрологияда верификация тизими жорий этилади

Метрология соҳасини халқаро талабларга мослаштириш доирасида 2027 йил 1 январдан ўлчаш воситаларини қиёслаш амалиёти бекор қилиниб, қонунлаштирувчи метрологияда верификациялаш тизими жорий этилади. 2026-2027 ўқув йилидан соҳавий йўналишларда ўқувчи талабалар учун янги ташаббуслар амалга оширилади.

Фото: Depositphotos

Президент фармонига мувофиқ, 2027 йил 1 январдан бошлаб қуйидаги ўзгаришлар кучга киради:

ўлчаш воситаларини қиёслаш амалиётидан воз кечган ҳолда, қонунлаштирувчи метрология доирасида верификациялаш тизими жорий этилади;
саноатда фойдаланилаётган ва маҳсулот сифатига бевосита таъсир қиладиган ўлчаш воситалари калибрлашга ўтказилади, стандарт намуналарни аттестациядан ўтказиш тартиби бекор қилинади;
калибрлаш лабораторияларининг Халқаро тарози ва ўлчашлар бюроси базасида эътироф этилган калибрлаш имкониятлари қайд этилган йўналишлари аккредитациядан ўтишдан озод қилинади.

Шунингдек, 2026-2027 ўқув йилидан стандартлаштириш, метрология ва мувофиқликни баҳолаш йўналишларида таҳсил олаётган ОТМ талабалари учун:

“Махсус стипендия” таъсис этилади;
ривожланган давлатлар, хусусан Европа Иттифоқининг техник жиҳатдан тартибга солиш (Technical Regulation) тизимини ўрганиш модели асосида дарс соатлари жорий қилинади;
сўнгги 2 йилни хорижий университетда давом эттиришни назарда тутувчи “2+2” шаклидаги қўшма таълим дастурлари ишлаб чиқилади.