Тошкент иқлимига мос кўчатлар етиштириш йўлга қўйилди

Пойтахтда умумий майдони 21 гектар бўлган ҳудудда Тошкент иқлимига мос дарахт ва буталар кўчатларини етиштириш ишлари бошланди. Майдон автоматик томчилатиб суғориш тизими билан жиҳозланиб, суғоришда артезиан сувидан фойдаланилади.

Фото: Видеодан кадр

Тошкент шаҳри иқлимига мос кўчатларни етиштириш бўйича янги лойиҳа доирасида 21 гектар ҳудудда дарахт ва буталарни парваришлаш йўлга қўйилди. Ушбу майдонга эман, чинор, липа, лола дарахти, заранг ҳамда садақайрағоч каби турлар экилиши режалаштирилган.

Қайд этилишича, ҳудуд тўлиқ автоматик томчилатиб суғориш тизими билан жиҳозланади. Суғориш жараёнларида артезиан сувидан фойдаланилади.

Ҳозирда 5 гектар майдонда кўчат экиш ишлари бошланган бўлиб, бу ҳудудга 6 турдаги жами 8 640 та дарахт кўчати экиш кўзда тутилган. Кўчатлар икки йил давомида шу ерда парвариш қилиниб, кейинчалик Тошкент шаҳрининг турли ҳудудларига кўчириб ўтказилади.

Маълум қилинишича, кўчатлар Туркия, Италия, Германия, Нидерландия, Испания, шунингдек Европа ва Хитойдан келтирилмоқда. Ишлар туркиялик мутахассис назорати остида амалга оширилмоқда.