Туркия ва Ўзбекистон дипломатик муносабатлар ўрнатилганининг 34 йиллигини нишонламоқда

Шу кунларда Туркия ва Ўзбекистон ўртасида дипломатик муносабатлар ўрнатилганининг 34 йиллиги нишонланмоқда. Икки давлат ўртасидаги алоқалар «мустақилликни тан олган биринчи давлат»дан «кенг қамровли стратегик шериклик» даражасигача бўлган йўлни босиб ўтгани билан эътиборни тортади. Бу ҳақда Туркиянинг Anadolu нашри мақоласида айтилади.

1991 йил 31 августда ўз мустақиллигини эълон қилган Ўзбекистон ва 1991 йил 16 декабрда бу қарорни биринчи бўлиб тан олган Туркия ўртасида дипломатик муносабатлар 1992 йил 4 мартда ўрнатилган.

Туркия Ўзбекистонда ўз элчихонасини очган биринчи давлат бўлди. Туркиянинг Тошкентдаги элчихонаси 1992 йил апрелда, Ўзбекистоннинг Анқарадаги элчихонаси эса 1993 йил январда иш бошлади.

Ўзбекистон мустақилликка эришганидан сўнг, ўтган 34 йил давомида икки давлат ўртасидаги муносабатларда турли сабабларга кўра юксалиш ва пасайиш даврлари бўлди.

Ўзбекистон ва Туркия ўртасидаги муносабатларнинг янги босқичи президент Ражаб Тоййиб Эрдўғаннинг 2016 йил ноябрь ойида Самарқандга ташрифи билан бошланди.

Ушбу ташриф давомида Эрдўған Ўзбекистон президенти Шавкат Мирзиёев билан учрашувлар ўтказди, натижада икки томонлама муносабатлар фаоллашди ва янги туртки олди. Шундан сўнг, 2017 йил октябрь ойида Мирзиёев 21 йиллик танаффусдан сўнг Туркияга президент сифатида ташриф буюрган энг юқори мартабали ўзбек амалдори бўлди.

Икки мамлакат президентларининг яқин дўстлиги ва кучли сиёсий иродасига мувофиқ, 2017 йилда Туркия - Ўзбекистон муносабатлари стратегик шериклик даражасига кўтарилди. Кўп йиллик танаффусдан сўнг Туркия ва Ўзбекистон қўшма иқтисодий комиссиясининг йиғилишлари қайта тикланди.

2018 йилда икки давлат раҳбарлари бошчилигида Туркия ва Ўзбекистон ўртасида Стратегик ҳамкорлик бўйича олий даражадаги кенгаш тузилди. Кенгашнинг биринчи йиғилиши 2020 йил февраль ойида Анқара шаҳрида, иккинчиси 2022 йил март ойида Тошкент шаҳрида, учинчиси 2024 йил июнь ойида Анқара шаҳрида бўлиб ўтди.

Сўнгги йилларда икки мамлакат ўртасида олий даражадаги ўзаро ташриф ва мулоқотлар фаоллашди, икки давлат президентлари сўнгги уч йилда беш марта бир-бирини зиёрат қилди.

Ўзбекистон президенти Шавкат Мирзиёев охирги марта январь ойида расмий ташриф билан Анқарага борган, унинг доирасида Туркия ва Ўзбекистон ўртасидаги Стратегик ҳамкорлик бўйича олий даражадаги кенгашнинг тўртинчи йиғилиши бўлиб ўтганди.