Испания АҚШнинг ҳарбий ҳамкорлик ҳақидаги баёнотларини рад этди

Испания АҚШнинг “Мадрид Вашингтон босимига бўйин эгиб, Эронга зарба бериш учун ўз ҳарбий базаларини тақдим этишга рози бўлди” деган баёнотларини рад этди. Испания ҳукумати позицияси ўзгармаган, деди 4 март, чоршанба куни Cadena SER радиостанцияси эфирида Испания ташқи ишлар вазири Хосе Мануэл Альбарес. Шу куннинг ўзида Оқ уй матбуот котиби Кэролайн Ливитт Испания америкалик ҳарбийлар билан ҳарбий ҳамкорликка рози бўлганини маълум қилган эди. “Менимча, улар кеча президентнинг хабарини аниқ ва равшан эшитди”, — деди Ливитт. У бу гапи билан Доналд Трампнинг Мадрид билан савдо муносабатларини узиши мумкинлиги ҳақидаги таҳдидини назарда тутган.

Албареснинг айтишича, Испаниянинг АҚШ билан “ҳарбий тарзда ҳамкорлик қилишга” тайёрлиги ҳақидаги хабарлар “қатъий равишда ҳақиқатга тўғри келмайди”. El País газетаси ёзишича, бош вазир Педро Санчес аввалроқ Испаниянинг можародаги позициясини “икки сўз билан — урушга йўқ” дея таърифлаган.

Испания НАТОда АҚШ ва Исроилнинг Эронга қарши ҳарбий операциясига очиқдан очиқ қарши чиққан ягона давлатга айланди. Испания базалари атрофидаги тортишув Мадрид билан Вашингтон ўртасида мудофаа харажатлари миқдори масаласида кенгроқ қарама-қаршилик кучайган бир пайтда юзага келмоқда. Испания НАТОда 2035 йилга қадар ҳарбий харажатларни ЯИМнинг 5 фоизигача оширишдан бош тортган ягона давлат бўлиб қолмоқда. Евроиттифоқ АҚШнинг эҳтимолий савдо санкцияларидан Испанияни ҳимоя қилишга тайёр эканини билдирди.

АҚШ ва Исроил 28 феврал куни эрталаб Эрон ҳудудига зарбалар бера бошлади. АҚШ президенти Доналд Трамп Ислом Республикасининг ядровий дастурини йўқ қилиш нияти борлигини айтди ва Эрон армиясини қурол ташлашга, мамлакат аҳолисини эса “тақдирини ўз қўлига олишга” чақирди.

Эронда зарбалар оқибатида камида 787 киши ҳалок бўлган, деб 3 март куни давлат оммавий ахборот воситалари Эрон Қизил Ярим Ой жамияти маълумотларига таяниб хабар берди. Эрон жавобан Исроилга ва Форс кўрфазининг бир қатор давлатларига зарба берди, у ерда ҳам ҳалок бўлганлар бор. Теҳрон араб давлатлари билан уришмаётганини, балки минтақадаги АҚШ ҳарбий базаларига зарба бераётганини таъкидламоқда.